Атом сынақтарының қасіретін көрген Семей халқы әлеуметтік көмекке зәру

Қырық жыл атом сынақтарының қасіретін көрген Семей өңірінің халқына лайықты әлеуметтік көмек қажет. Радиацияға әбден уланған өңірдің өзекті мәселелерінің бірі - экологиялық төлемдердің тым аз екенін айтады қала тұрғындары. Ғалымдар да бұл сынақтың салдары әлі де жылдарға жалғасатынын жоққа шығармайды. Қаладағы қоғам белсенділері қырық жыл қырғыннан көз ашпай, полигонның зардабын тартқан халыққа берілетін мардымсыз экологиялық төлемдерді қайтадан қарау керек деген пікірде.Семей өңірінің халқына лайықты көмек беру қажеттігін Қасым-Жомарт Тоқаев өткен жылдың сәуір айында Семейге келген сапарында өзі де айтып, Үкіметке полигон аймағындағы халыққа берілетін әлеуметтік көмектің мөлшері жөнінде нақты ұсыныстар әзірлеуді тапсырған еді. Қоғам белсендісі Ерлан Шаяхметұлы Президенттің пәрменін орындау тым созылып кетті деп ашынады.ЕРЛАН ШАЯХМЕТҰЛЫ, қоғам белсендісі:– Арал тұрғындарының экологиялық алатын өтемақысымен салыстырғанда түкке тұрмайды. Айтуға ұялатын тиын ғана. Сондықтан Үкіметтен осыны талап етеміз. Өтемақының қайта қаралып, өзінің әділ бағасын алуына. Шаяхметұлының «айтуға ұялатын тиын» деп тұрғаны - жұмыс істейтін азаматтардың жалақысына ай сайын қосылатын экологиялық үстеме. Төрт мың бір жүз алпыс жеті теңге. Бірақ оған да барлығының қолы жете бермейді. Жеке бизнесте жұмыс істейтіндер сол азын-аулақ төлемнің өзін де ала алмайды. Лайықты көмектің қолға тимеуі заңның олқылығынан дейді көпшілік. Өйткені, «Семей полигоны» туралы заң 1992 жылы қабылданған. ЕРМЕК МҰРЫМБАЕВ, қала тұрғыны:– Мына 92-ші жылдары қарастырылған заң арқылы беріліп отырған өтемақылары қазіргі заман талабына сай емес. Негізі көбінесе алып жатқандар мынау он күндік қосылатын демалыс күндері тек қана бюджеттегі, мемлекеттік қызметкерлер ғана алады. Жеке кәсіпорындарда қалай екенін білмеймін. Жұмыс істемейтін азаматтар да ала алмайды. Қалалық әкімдік мамандарының айтуынша, тоқсан алтыншы жылдан бастап 179 мыңға жуық адам 3 миллиард теңгенің бір жолғы өтемақысын алыпты. 1993 жылы төтенше және ең жоғары аймақта тұрған азаматтарға ақшалай өтемақы толықтай төленген. Биыл 771 адамнан сынақ полигонының куәлігін рәсімдеуге құжат қабылданыпты. АЙДЫН СҮЛЕЙМЕНОВ, Жұмыспен қамту және әлеуметтік бағдарламалар бөлімінің бас маманы:– Бүгінгі таңда жоғары және ең төменгі аймақта тұрған азаматтарға ақшалай өтемақы қабылдауға, қабылдау жұмыстары ары қарай жүргізіліп жатыр. Арнайы анықтамаларын әкеліп, бөлімге келіп, өтініш жазып, ақшалай өтемақыларын алуға болады. Өткен жылдың соңында әзірленетін ұсыныс жайында Үкімет жақтан үн жоқ әзірге. Қырық жыл қасірет көрсе де, қабырғасы қайыспаған Семей өңірінің халқы үмітін үзбей, Елорда жаққа елеңдеумен әлі жүр. Ерзат Жанатұлы, Санат Иманғали
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Атом сынақтарының қасіретін көрген Семей халқы әлеуметтік көмекке зәру канала Информбюро 31