Шавкат Мирзиёев Тошкент шаҳрининг Янгиҳаёт ва Сергели туманларига ташриф буюрди

Президентимиз Янгиҳаёт туманидаги «Almerro group» масъулияти чекланган жамиятининг қандолат корхонасини кўздан кечирди.
Умумий қиймати 70 миллиард сўм бўлган ушбу корхонанинг биринчи босқичи ўтган йили ноябрда ишга туширилган. Корхона йилига 2 минг тоннага яқин қандолат маҳсулотлари тайёрлаш қувватига эга. 120 киши иш билан таъминланган.
Давлатимиз раҳбари қандолат маҳсулотлари сифатини кўрди, таннархни пасайтириш бўйича тавсиялар берди.
Давлатимиз раҳбари “Янгиҳаёт” индустриал технопарки қуриладиган майдонида бўлди.
Мажмуа учун 210 гектар майдон ажратилган. Шундан 150 гектари икки босқичда аукцион савдоларига чиқарилади. Бу ерда жойлаштириладиган корхоналарда 20 минг иш ўрни яратилиши мўлжалланган.
Президент шу ерда Янгиҳаёт туманидаги корхоналар маҳсулотлари билан ҳам танишди.
Президент Шавкат Мирзиёев Янгиҳаёт туманидаги Дўстлик маҳалласи ҳаёти билан танишди.
Бу ерда 11 та кўп қаватли уй бўлиб, 4 минг нафардан зиёд аҳоли яшайди. Ўтган йили “Обод маҳалла” дастури доирасида ҳудуд ободонлаштирилди. Болалар ўйингоҳи, спорт майдончаси, савдо ва касаначилик дўконлари барпо этилди.
Давлатимиз раҳбари ушбу бунёдкорлик ишларини кўздан кечирди. Фуқаролар йиғинининг янги биносида маҳалла фаоллари билан мулоқот бўлди.
Давлатимиз раҳбари Тошкент айланма йўли бўйида сервис мажмуасини барпо этиш лойиҳаси билан танишди. Унда кечаю кундуз ишлайдиган савдо, овқатланиш ва маиший хизмат шохобчалари бўлади. Уларни арзон ва тез қуриш мақсадида юк контейнерларидан фойдаланилмоқда.
Президент пойтахтда ҳаракатланаётган электробусни кўздан кечирди. «Яшил» транспорт тизимини ривожлантириш, метрополитеннинг кейинги босқичлари ва трамвай йўналишини белгилаш бўйича кўрсатмалар берди.
Президент Шавкат Мирзиёев Янгиҳаёт туманидаги “Тошкент индекс” савдо ва хизмат кўрсатиш мажмуасини бориб кўрди.
Мажмуа ҳудуди 72 гектар. Бу ерда қарийб 1 триллион 300 миллиард сўм эвазига савдо дўконлари, логистика ва экспо марказлари, меҳмонхона, ошхона барпо этилмоқда. Уларда жами 13 мингта янги иш ўрни ташкил этилади.
Шу ерда Янгиҳаёт ва Сергели туманларини иқтисодий-ижтимоий ривожлантириш масалалари юзасидан йиғилиш ўтказилди.

Видео Шавкат Мирзиёев Тошкент шаҳрининг Янгиҳаёт ва Сергели туманларига ташриф буюрди канала UZBEK TV