РЦИ-А полилингвалон системæйы фæлтæрддзинад сæхицæн бындурæн райсыны фæнд кæнынц Кæсæг-Балхъары

Полилингвалон ахуырад Цæгат Ирыстоны скъолаты æмæ рæвдауæндæтты парахат кæны. Сывæллæтимæ уыцы иу рæстæг кусынц иронау æмæ уырыссагау. Системæ сфидар кодтой «Ирон æвзаджы национ æмæ культурон рæзты» сæрмагонд программæйы фæлгæты. Йæ ахадындзинады кой айхъуыст Цæгат Кавказыл дæр. Арæх нæм æрцæуынц минæвæрттæ сыхаг республикæтæй. Ныр дæр та нæм ссыдысты Кæсæг-Балхъарæй. Фæнды сæ, цæмæй уыдонмæ дæр скъолаты æмæ сывæллæтты рæвдауæндæтты байгом кæной ахæм кълæстæ æмæ къордтæ. Полилингвалон ахуырады дæнцæг сын равдыстой Алагиры 10-æм сывæллæтты рæвдауæндоны. Бæлвырддæр радзурдзæн Дзæдзойты Фатимæ.

Ацы сабитыл кæд нырма æртыгай æзтæ цæуы, уæддæр сæ фыццаг ныхæстæ, æнкъарæнтæ æмæ хъуыдытæ æргом кæнынц мадæлон æвзагыл. Уымæн æмæ йæ хъусынц æрвылбон.

Сывæллæтты рæвдауæндон ныр 5 азы кусы полилингвалон системæмæ гæсгæ. Ахуыртæ уой æви хъæзтытæ, уæлдай нæу. Алы æрмæг дæр сывæллæттæн æмбарын кæнынц иронау. Сæйраг нысан у, цæмæй сæ гыццылæй фæстæмæ райдайой хъуыды кæнын мадæлон æвзагыл.

Ныридæгæн нæ республикæйы полилингвалон системæ апарахат 48 рæвдауæндоныл. Уыдоны 90 къордæй фылдæр райсомæй суанг изæрмæ архаынц мадæлон æвзагыл. Скъолаты нымæц къаддæр у, сты 16, сæ кълæстæ 40-ы бæрц. Цæгат Ирыстоны ахуырад æмæ наукæйы министрад архайы систæмæ ноджыдæр рапарахат кæныныл. Ног ахуыры азмæ сæм и ног нысан – полилингвалон кълæстæ æмæ къордты нымæц 2 хатты фæфылдæр кæнын.

Ацы системæйы ахадындзинады кой айхъуыст æгас Цæгат Кавказыл дæр. Арæх нæм æрцæуынц минæвæрттæ сыхаг республикæтæй. Ныр дæр та нæм æрбацыдысты Кæсæг-Балхъарæй Адыгейы хистæрты советы уæнгтæ. Куыд зæгъынц, афтæмæй уыдонмæ дæр ис ахæм фарстатæ. Мадæлон æвзагыл нал дзурынц кæстæртæ. Катай кæнынц. Уынынц, куыд хорз арæзт у системæ махмæ, уый. Æмæ сæ фæнды, цæмæй уыдонмæ дæр байгом кæной скъолатæ æмæ рæвдауæндæтты ахæм кълæстæ æмæ къордтæ. Полилингвалон ахуырады дæнцæг сын равдыстой Алагиры 10-æм рæвдауæндоны. Сæ æнтыстдзинæдтæ сæм фæкатысты бæллиццаг.

Уазджытæ абарстой кæстæр æмæ хистæр къордты сывæллæтты. Сæхæдæг æй федтой, цыхуызæнæй æрбацæуынц, æмæ гыццыл семæ куы акусынц, уæд дзы цы рауайы, уый. Хистæр къорды сывæллæттæ сын бацæттæ кодтой аргъау «Тæрхъус æмæ рувас». Кæй зææгъын æй хъæуы, ирон æвзагыл.

Ирыстоны дæнцæг бафæзмынмæ хъавынц Кæсæг-Балхъары дæр. Полилингвалон ахуырады руаджы сабитæ дзурдзысты сæ мадæлон æвзагыл. Афтæмæй, та йын фесæфæнæй тас нæу.

_________________________
Мы рядом в:
vk.com/irystontv
instagram.com/irystontv
youtube.com/irystontv
twitter.com/irystontv
ok.ru/irystontv

Видео РЦИ-А полилингвалон системæйы фæлтæрддзинад сæхицæн бындурæн райсыны фæнд кæнынц Кæсæг-Балхъары канала iRYSTON TV