Bacarjos - Gavoi - Carrasecare 2022

Battor annos bacarzu so istau
bacarzende sas bacas de Fulanu
in atonzu, in iberru e in beranu
mai de murgher mi so irgulau.

Dau m'abiat manu una tentorja
chi si giamabat "Graziosa in trattu".
su e la 'ider passare in sa cussorja
mi poniat a mùilos infattu.

Finidu su recattu in paperile
a camba la paschìo in bidathone,
murgher la costumabo a s'impuddile
a sa padedda e a su malinzone.

Trabìle de resone mazolada
cunsidera padronu inue sese
dae sa matessi die chi est anzada
zustamente lompìat annos trese.

Dae sa matessi die chi l'an zutta
l'an bida supuzada intro 'e sinu,
s'iverru imbeniente si l'at sutta
unu vitellu orfànu allattadinu.

Malu incrinu tenides a furare
sos vitellos de maju e lampadithos
supra su tempus ana a mezorare
mancari como parjan' arganithos.

Semper nd'imbitho de sos intumaos
si podet bennere su mese 'e aprile
more po no los tènner'inserraos
totu sa chida manna in su prechile.

Su bachile serramus in beranu
si so galu in s'impreu de bacarzu
su mazolu nigheddu pilipranu
comu l'irmartit su latte primarju.

Su chivarju li ponzo in sa cherina
si irbithare lu potho su mazolu,
si no lu parat cresura e ispina
li frabico unu muru de casizolu.

Solu l'avia murta duos annos
sa trabilutha de carinighedda
cand'incontesi sos bacarjos mannos
lis navo in su beranu istiri indedda.

Sa padedda m'umpriat una bacca
sende chi fin tantas in sa truma,
unu malune de battor intaccas
m'umpriat battor bortas a ispruma.

Issa non costumabat a cuare
semper dolenziosa a su murtore,
si s'acatat a tempus de anzare
lu consolat su poveru pastore.

A minore pariat ocriana
a manna rebentia ch'est maseda
sa bacca mia pomposa e galana
fui chene la murgher dae meda.

in Campeda faghiat istamenta,
non fud'istansiale a sa muntanna
a bisumeu jai boch'el'ant tenta
sa corrirberticada ispana manna.

Si no a Olopanna cun bonos faeddos
l'incarrigo su dannu a Musighera
como ch'ant postu ghetu a sos nobeddos
mai nde tenet pasu sa frontera.

In sa barrera de sa bidathone
uve b'at boe sa trabile abìtat
ca su pastore est unu mamuthone
no at abilidade nè impitta.

Roba bona 'e titta est roba sana,
in sa cussorja sua andat fidele
a atonzare in sartos de Othana,
a iberrare in sartos de Lochele.

Pegus ch'andat fidele in sa cussorja
dae Deu sa paga no li mancat
cando l'avio domada a tentorja
bajulabat sa manu in mesu e ancas.

A s'ala manca e a lados deretu
mai l'aviat fattu manizada,
grassias nde li torro a su suzzettu
chi mi l'aviat bene industriada.

S'annada mala de s'annu bisestru
sa mandra m'est servia a passivale,
pustis murta torravo po su restu:
nde murghio s'ispesa e su chenale.

Po cuddu naturale suo bellu
m'abarrabat a murgher chene 'une;
a pustis allattau su vitellu
m'umpriat battor bortas su malune.

Ma peri chen e fune la murghio
dolenziosa beniat a manu
s'aunzu mi teniat fitianu
a tot'ora chi deo lu cherio.

Ca timio a m'essire casu malu
mai nd'avio postu cazu anzenu;
a su mere l'imbio su regalu
in su beranu chene siccar'enu.

Mi nd'apo prenu unu chirru e domo
de casu fattu a sa moda Oranesa
e sos rivales torradu m'an como
nen bacca, nen bachile, ne ispesa.

Si m'essit balentesa apo a leare
in d'un'ateru tazzu fatho prou
so in fidea de che lia torrare
chi si la chistat su pastore nou.

Unu zou li ponzo a su cosinzu
si m'il istimo chenza perdimentu,
si mi la colo in ateru paschinzu
a fura prana mai mi nd'ana tentu.

Andet in aumentu su cumone
cun su nobeddu de s'arrendadore
cudda die l'an bida in bidathone.
Mira non ti suzedat canchi errore.

Bae cun contipizu e coidau
battor annos bacarzu so istau.

Cantoni Buttu

Видео Bacarjos - Gavoi - Carrasecare 2022 канала chiccoevani2