Нұрсұлтан Назарбаев Отан қорғаушы күніне арналған концертке қатысты

Отан қорғаушы күніне арналған негізгі шараның бірі Орталық концерт залында өтті. Мерекелік концертке Қарулы күштердің Жоғарғы бас қолбасшысы, Елбасы Нұрсұлтан Назарбаев қатысты.

Ертең еліміздің Қарулы күштерінің құрылғанына 24 жыл толады. Көпшілік алдында сөз сөйлеген Мемлекет басшысы осы аралықта толыққанды Қарулы күштердің қалыптасқанын айтты.

Қазақ әскері айбынды армияға айналып, заманауи техникамен жабдықталған. Оқу-жаттығу жасауға да барлық жағдайы бар. Жауынгерлерге қолдау мұнымен шектелмек емес.

«Биылдан бастап әскерилер үшін жаңа тұрғын үй бағдарламасы іске асырылады», – деді Президент. Сөйтіп алдағы 4-5 жылдың көлемінде сарбаздарды баспанамен қамту мәселесі шешілмек.

Бұдан бөлек келер жылдан бастап әскери қызметкерлердің жалақысы көтерілетінін айтты.

Салтанатты шара мерекелік концертке ұласты. Қорғаныс министрлігінің әскери ансамблі мен эстрадалық-симфониялық оркестрдің солистері өнер көрсетті.

Танымал өнер жұлдыздары да сахнадан табылып, патриоттық әндер шырқады.

Мұхтар Алтынбаев, ҚР Парламенті Сенатының депутаты

-Ең негізгі баға – еліміздің тыныштығы мен жұртымыздың тұтастығы. Жері тұтас, шекарасы берік. Сондықтан мына Қарулы күштері өздерінің міндетін дұрыс атқарып жүр деп ойлаймын.

Ким Серікбаев, ҚР Қарулы күштерінің ардагері

-Халыққа қойған Елбасының мақсаты бар «Мәңгілік ел» деген. «Мәңгілік ел» боламыз егер де еліміз, айналамыз тыныш болса. Мына жақын көршілерімізбен жақсы тұрсақ, бүкіл жер жүзіндегі мемлекеттермен жақсы тұрсақ, онда Қазақстанның келешегі болады. Күмән жоқ. Сол 30 мемлекеттің қатарына қосылады деген пікіріміз әрдайым ойымызда.

Жазира Асанова, ҚР ҚК Құрлық әскерлері Бас қолбасшысы басқармасының аға офицері

-Барша қазақстандықтарды, Қазақ елінің азаматтарын келе жатқан 9 мамыр Жеңіс күнімен, 7 мамыр Отан қорғаушылар мерекесімен шын жүректен құттықтаймын. Аспанымыз ашық, іргеміз берік, жұртымыз тыныш болсын.

Видео Нұрсұлтан Назарбаев Отан қорғаушы күніне арналған концертке қатысты канала novosti khabar2016