Мұнайшының жұмбақ өлімі

"Өзенмұнайгаз" компаниясының "Бұрғылау жұмыстары" басқармасына өз аяғымен жұмысқа кеткен мұнайшының өлімі туыстарына жұмбақ болып отыр. Төртінші дәрежелі оператор қызметін атқарған Жұмабек Жамаловтың өмірден өткеніне бүгін он сегіз күн. Бірақ оның қандай жағдайда қайтыс болғаны әлі белгісіз. «Өзенмұнайгаз» компаниясы қызметтік тексеріс бастаған көрінеді. Ал компания басшылығымен тілдесе алмай отырмыз деп бізге хабарласқан марқұмның туыстарын әріптесім Махаббат Нұржанқызы тыңдап қайтты.
Марқұмның анасының айтуынша, 10 қаңтар күні Жұмабек түнгі ауысымға жұмысқа барған кезінде соңғы рет хабарласқан. Осыдан кейін туыстары оның денесін мәйітханадан бір-ақ тауыпты. Айтуларынша, мәйітті көруге рұқсат бермеген. Тек жерлеу кезінде Жұмабектің денесінде жарақаттың бар екенін байқаған. Сондықтан да жақындары бұл өлімнің күмәнді екенін айтады.
РАЗИЯ ТҮЛКІБАЕВА, марқұмның анасы:
– Балам 10-ы күні екінші сменге жұмысқа кетті. Маған телефон соғып хабарласып еді «Мама, уайымдама, жұмыстамын» деді. Содан кейін таңғы сағат төртте маған тумаласым телефон соғып «балаңыз больницада жатыр» деді. Больницаға жүгіріп барсақ больницада моргте жатыр екен. Баламның өліміне жазықты адамдар заңды түрде жазаланса екен деймін.
ДАРИҒА БАЗАРБАЕВА, марқұмның жұбайы:
– Қалай қайтты, не болды әлі анық-қанығын ештеңе айтып жатқан жоқ. Одан бері міне жиырма күн өтті ешқандай результат жоқ. Даже үстіндегі киіп кеткен киімдерін де бермей жатыр.
Редакциямыздан көмек сұраған марқұмның туыстары «жұмыс уақытында қаза тапқан Жұмабектің өлімі жөнінде компания ешнәрсе айтпады, тіпті хабарласпады» дейді. Ал «Өзенмұнайгаз» компаниясы өз қызметкерлерінің 10 қаңтар күні түнгі он екілер шамасында жұмыс орнынан рұқсатсыз кетіп қалғанын айтады. Қызметкер еңбек шартындағы тәртіпті бұзғандықтан, оның қазасына компания жауап бермейді дейді.
ӘДІЛ СҮЙЕБАЙ, «Өзенмұнайгаз» АҚ Қоғаммен байланыс департаментінің директоры:
– Осы іс бойынша қазіргі таңда қызметтік тексеру жүргізіліп жатыр компанияда. Марқұмның жанұясына 291 мың 700 теңге материалдық көмек көрсетілді. Сонымен қатар, «Өзенмұнайгаз» акцинерлік қоғамы Жамалов Жұмабектің банктен алған несиесін өтеу мақсатында 5 миллион 572 мың теңге қаражат бөлу жөнінде шешім қабылдады.
МАХАББАТ НҰРЖАНҚЫЗЫ, тілші:
– Жаңаөзен қаласының көпбейінді ауруханасында Жұмабек Жамаловтың мәйіті 11 қаңтарға ауысқан түнгі сағат екіде жеке көлікпен жеткізілгенін мәлімдеді. Одан басқа ешқандай ақпарат жоқ. Асыраушысынан айырылған Жұмабектің туыстары енді компанияға отбасынан бір адамды қызметке орналастыруын талап етеді.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#информбюро #басты_жаңалықтар

Видео Мұнайшының жұмбақ өлімі канала Информбюро 31