СИИБИКТЭЛЭРГЭ КЫСТЫК ТҮМҮГЭ

Ньурба улууһугар сүөһүгэ, сылгыга кыстык этэҥҥэ түмүктэннэ. Бааһынай хаһаайыстыбалар күөххэ үктэнэн, кыстыгы түмүктээн сайылыкка көһөөрү бэлэмнэнэллэр. Улууска биллэр бөдөҥ хаһаайыстыбалартан биирдэстэрэ Сүлэ нэһилиэгэр «Сибииктэ» бааһынай хаһаайыстыба 250-тан тахса төбө сүөһүтэ быйылгы кыстыгы этэҥҥэ туораата. 350-ча тонна отунан уонна 500-чэкэ тонна сиилэһинэн кыстаабыттар, сиилэстэрэ өссө да ордон сүөһүлэр күн бүгүн хотонно аһыы тураллар. Ынах –сүөһү аһынан хааччыллыыта үчүгэй буолан уонна улэһиттэрим кыһамньыларынан, улахан кыһалҕаны көрсүбэтибит диэн хаһаайыстыба салайааччыта санаатын үллэстэр. Хаһаайыстыбаҕа үлэ сарсыардаттан киэһээҥҥэ диэри күөстүү оргуйар. Бүгүҥҥү күҥҥэ 105 ынах ыанар,барыта 72 тарбыйах баар. Кэргэнниилэр Вячеслав уонна Сардаана Акимовтар «Сиибиктэҕэ» үлэлээбиттэрэ номнуо 4 сыла. Сардаана тарбыйахтары көрөр-истэр, Вячеслав сүрүн үлэтинэн ыаһыҥҥа сылдьар. Интернет ситимэ сайдан, онтон араас сүбэлэри кэргэним Сардаана, ньирэйдэри аһатарыгар үксүн туһанар диэн, Вячеслав санаатын үөрэ-көтө үллэстэр. Тыа сиригэр сүөһүнү-сылгыны ииттиигэ элбэх өрүт суолталаах. Манна аҥардас хотон, сүөһү сиир аһа, техника эрэ буолбакка саамай сүрүнэ- туруу үлэһит дьонноох буолуу элбэҕи быһаарар. «Сиибиктэлэр» бары биир киһи курдук хаһаайыстыбабыт туһугар диэн санаанан салайтаран күүскэ үлэлиир буоланнар, кыстыктарын этэҥҥэ түмүктээн, бу күннэргэ сайылыкка тахсаары күннэрин, хонуктарын ааҕаллар.

Видео СИИБИКТЭЛЭРГЭ КЫСТЫК ТҮМҮГЭ канала ТРС НЮРБА