Құрылысы бес жылға созылған Ақтөбедегі «сувенир» мектеп әлі қолданысқа берілген жоқ

Ақтөбеде құрылысы бес жылға созылған мектеп әлі қолданысқа берілген жоқ. Білім ордасының ашылуын күтіп шаршаған тұрғындар оны «сувенир» десе, енді бірі ЭКСПО- дан да мықты «музейге» айналды дейді. Алайда мемлекеттен бір жарым миллиард теңге бөліп берген әкімдіктегілер, сағызша созылған мектеп құрылысына пандемия мен мердігер мекеменің ішкі мәселелері себеп болғанын айтады. Сөздерінше мектеп алдағы оқу жылы ашылмақ. Ал оған дейін Нұрлы ауданының бес жүзге жуық оқушысының көрші ауылдағы үш ауысымдық мектепке қатынап оқуына тура келеді.
Бес жыл бойы әр қыркүйек сайын мектептің ашылуын тағатсыздана күтіп, ақыры ұл-қызын көрші аудандарға оқуға тасуға мәжбүр халық әбден шаршаған. Тұрғындар құр қабырғасы қаланған бұл нысанға «музей мектеп» деп ат қойыпты. Өйткені бес жылдан бері тек сыртынан қарап, сүйсініп қоямыз дейді. Айтуларынша, мектептің құрылысы ЭКСПО ғимаратынан да мықты. Себебі бір жыл емес, бес жыл бойы салып жатыр дейді. Ал ашылмаған мектебі бар ауданның балалары көрші елді мекендегі үш ауысымдық мектепке күнде осылай автобуспен қатынап оқиды.
СЕРІКҚАЛИ ӘБУҒАЛИЕВ, тұрғын:
– Ол мектеп ашылса ашылады, ашылмаса жарып жіберу керек. Басқа ештеңе қалған жоқ. Немеремнің оқып жатқанына міне үшінші қыс. Қызылжарға жібереміз. Қызылжардан алып келеміз. Сол мектепті осы балаларды оқыту үшін салды ғой.
БАҒДАТ ДОСОВ, тұрғын:
– Қарап қоямыз, сұрап қоямыз бір-бірімізден. Білмеймін, ашылмайды. Қашан ашылатынын да белгісіз. Әне-міне деп әлі келе жатырмыз. Үйдің қасында мектеп тұрғанда. Қаншама үй бар салынып жатқан. 19-22 -лердің бәрін берді. Осы жердің барлық баласы сонда қатынап оқиды, мына үшінші микрорайонға барады.
Ал әкімдіктегілер жыр болған мектеп құрылысын алдағы оқу жылына дейін аяқтап береміз деп сендіріп отыр. Сөздерінше, құрылыстың бес жылға созылуына пандемия мен мердігер мекеменің ішкі мәселелері себеп болған.
БАУЫРЖАН ЖАНТӨРИН, Ақтөбе қалалық құрылыс бөлімі басшысының орынбасары:
– 2017 жылдың желтоқсан айында келісімшартқа отырдық. Одан кейін пандемия басталды. Артынша мектептің кейбір жобаларын өзгерттік. Мердігердің өзінің проблемалары болды. Қазір мектептің құрылысы бітуге жақын. Жұмыстың 80-90 пайызы дайын. Ішкі жұмыстары мен жылу жүйелері ғана қалды.
Алайда құрылысына деп мемлекеттен бір жарым миллиард теңге бөліп берген әкімдіктегілер мың балаға арналған білім ошағы бітуге жақын, тек ішінің әрлеуі мен сырлауы ғана қалды деп осыдан екі жыл бұрын да айтқан еді.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#Ақтөбе #сувенир_мектеп #құрылыс

Видео Құрылысы бес жылға созылған Ақтөбедегі «сувенир» мектеп әлі қолданысқа берілген жоқ канала Информбюро 31