Полиция белсенділерді неге ұстады?

Алматыда қала әкімінің тұрғындармен есептік кездесуіне қатыспақ болған бірнеше белсендіні полиция алып кетті. Ондаған азамат жиынға қатыса алмады. AzattyqLIVE тікелей эфирінде белсенді азаматтарды полицияның ұстауы мәселесін талқылап жатыр. Алматыдағы студия сарапшысы – құқық қорғаушы Ерлан Қалиев.

Алматы қалалық полиция департаменті қала әкімі Бауыржан Байбектің кеше, 20 ақпанда өткен есеп беру жиынына қатыспақ болған кейбір белсенділердің ұсталуына қатысты жауап берген.

Қалалық полиция департаментінің баспасөз хатшысы Салтанат Әзірбектің айтуынша, "полицейлер қоғамдық тәртіпті бұзу фактілерінің алдын алған".

Полиция департаментінің баспасөз қызметі таратқан хабарламасында "Әкімнің есеп беру кездесуі алдында бірқатар тұлға шараны бұзуға тырысты. Құқық қорғау органдарының бірнеше рет ескерткеніне қарамастан қоғамдық тәртіп бұзушылар шараны өткізуге кедергі келтіруін доғармады" деп жазылған.

Салтанат Әзірбектің хабарлауынша, полицейлер белсенділерді Әкімшілік құқық бұзушылық кодексінің "ұсақ бұзақылық" тармағына сәйкес ұстаған. Полиция департаменті "жағдайды анықтап, заңнамада көрсетілген шараларды қабылдау үшін ұсталғандар бөлімшелерге жеткізілді" деп мәлімдеді.

Кеше Азаттық қала әкімі Бауыржан Байбектің есеп беру жиыны басталар тұста бірнеше белсендінің ұсталғанын хабарлаған. Оның ішінде "Көкжайлауды қорғайық!" қозғалысы белсендісі Андрей Бузыкин бар. Құқық қорғаушы Ерлан Қалиев те өзінің ұсталғанын жазды. Белсенді Марат Тұрымбетов өзін полиция бөлімшеге әкетіп, кейін босатқанын хабарлады. Бір күн бұрын белсенділер Дильнар Инсенова мен Сахиб Жаңабаеваға полицияның барғаны туралы ақпарат шықты.

Оқи отырыңыз: Әкімдердің есеп беру жиыны қалай өтті?

Байбектің есеп беру жиыны алдында белсенділер алғаш рет ұсталып отырған жоқ. Былтыр Республика сарайына кірмек болған бірнеше белсенді мен азаматты бірнеше сағат шағын автобуста ұстап, кейбірін полиция бөлімшесіне әкеткен.

Бүгін, 21 ақпан күні Алматы студиясында өтіп жатқан AzattyqLIVE тікелей эфиріне құқық қорғаушы Ерлан Қалиев қатысады. Әкім есебіне бармақ болған азаматтарды полицияның ұстауы олардың конституциялық құқығын бұзған жоқ па? «Бұзақылықтың алдын алу» күдігінің бұл мәселеде қолданылуы орынды ма? Осы және өзге де сауалдарға заңгер жауап береді.

Бізге жазылыңыздар:
Фейсбук: https://www.facebook.com/azattyq/
ВК: https://vk.com/azattyqradiosy
Твиттер: https://twitter.com/AzattyqRadiosy
Телеграм: https://telegram.me/azattyq

Видео Полиция белсенділерді неге ұстады? канала Azattyq TV - Азаттық - Азаттык