Халық қашанғы тоналады? Құрылыс материалдарының бағасы 200-300 пайызға өсті

Елде құрылыс материалдары күн сайын қымбаттап барады. Әсіресе, үй тұрғызуға қажетті арматура мен цемент былтырғы осы уақытпен салыстырғанда 200-300 пайызға өскен. Көршілес елден келетін материалдарды айтпағанда, елімізде шығарылатын құрылыс заттары да 2-3 есеге көтерілген. Информбюроның тілшілері Қазақстанның төрт қаласындағы базарларға барып, бағаны өз көздерімен көрді.
ДИАНА САПАРҚЫЗЫ, тілші:
– Қарағандыда құрылыс материалдардың бағасы биылдың өзінде 2-3 есе қымбаттаған. Мысалы, ең жіңішке арматураның құны былтыр 320 болса, қазір 1200 теңгеден сатылып жатыр. Цементтің 40 келілік қабы 1500 теңгеден тұр. Сатушылар бағаның өсуін тауарды жеткізушілерден көреді. Ал үйлеріне жөндеу жүргізіп жатқан халық қажет болған соң амалсыздан қымбатшылыққа көніп отырмыз дейді.
СЕРІКГҮЛ ҚАНЖАРОВА, тұрғын:
– Былтырғы бағамен салыстырғанда биыл өте қымбатшылық жүріп жатыр. Екі есе баға қосылып жатыр. Мысалы 1 метр трубаның өзі 3 мың теңге. Не істейміз керек болған соң сатып аламыз.
СОВЕТХАН ШЕКЕРБЕК, тұрғын:
– Красканың бағасына кешегіден бүгін 100 теңгеге қосылды. Бүгін 100 теңге қосылып кетіпті. 1600 ғой, қазір 1700ден алып тұрмын.
РУСЛАН ЖАСҰЛАНҰЛЫ, тілші:
– Ал еліміздің солтүстігіндегі құрылыс материалдарын сататын орындарды аралаған біз де жағамызды ұстадық. Өйткені тек темір мен арматураның бағасы жарты жылдың ішінде ғана үш есеге яғни, үш жүз процентке қымбаттаған. Сәйкесінше, темірден жасалынған бұйымдардың да бағасы өскен. Мәселен екі ай бұрын ғана 250 теңге тұрған шегенің бір келісі қазір 750 теңге. Бояу мен цементтің бағасы елу пайызға, бөлмеаралық есіктер жиырма пайызға өскен. Сатушылардың сөзінше, құрылыс материалдарын шикізат күйінде Ресей мен Қытайға әкетіп жатқандықтан қымбаттаған екен.
МИХАИЛ НҰРАХМЕТОВ, сатушы:
– Бүкіл материалдарды өндірушілер шикізат күйінде Ресей мен Қытайға апарып сатады. Өйткені онда бұдан да қымбатқа сата алады. Сол себепті бізге жетпей жатыр. Тапшы болған соң, сұраныс көбейген соң баға да қымбаттап барады. Бұны ешкім қадағаламай отыр.
АБАЙ НҰРЖАНҰЛЫ, тілші:
– Құрылыс заттарының қымбаттауы дәл осы қарқынынан қайтпаса Қызылордадағы кейбір ірі құрылыс компаниялары жұмыстарын тоқтатуға мәжбүр боламыз деп отыр. Өйткені небәрі соңғы екі айдың өзінде құрылысқа қажетті материалдардың бағасы бірден 200-300 пайызға дейін өсіп кеткен. Ресейден әкелінетін тауарлардың бағасын айтпағанның өзінде, өз елімізде шығарылатын құрылыс заттары да аспандап тұр дейді кәсіпкерлер. Ал билік тарапынан бұған бірде-бір бақылау болмай отыр деп ашынады. Егер қарқыны қатты қымбатшылық бұдан әрі жалғаса берсе, құрылыс нысандарында жұмыс тоқтап, ірі компаниялар жабылып, жүздеген адам жұмыссыз қалуы мүмкін.
МАНАРБЕК ЕСПЕНБЕТОВ, «Промстрой сервис Е» ЖШС директоры:
– Жұмысын тоқтату мүмкін 100 пайыз. Бізде 3 жылдық деген жоба бар ғой. 18-жылы шығарылған жобаны 20-шы жылы шығарады тендерге. Екі баға екі түрлі. Енді 21-жылы вообще баға ұшып кетті. Оның ертең деңгейіне жеткенде ақша жетпей бәрі тоқтайды.
ЖАНАР ҚОЖАНОВА тілші:
– Ақтөбеде әсіресе цемент, темір, ағаш материалдарының бағасы былтырғы маусыммен салыстырғанда жүз пайызға өскен. Мысалы, цементтің бір тоннасына биыл алты мың теңге қосылыпты. Ал базарлар мен дүкендердегі құрылыс тауарларының бағасын бақылап, ай сайын мониторинг жүргізіп отырмыз деген әкімдіктегілердің сырттан келетін тауарлардың құнын тұрақтандыруға құзырлары жетпейді екен. Себебі Ақтөбеге келетін құрылыс материалдарының басым бөлігі шет елден тасымалданады. Сондықтан қымбатшылықпен қатар тапшылық та бар.
БЕКТЕНБЕК ИМАНҒАЗИН, Ақтөбе облыстық Құрылыс, сәулет және қала құрылысы басқармасы өндірістік бөлімінің басшысы:

– Ресей мемлекетінен, Қытай мемлекетінен келетін құрылыс материалдары қымбаттау үстінде. Біз өндіруші мекемелерге шыққан едік, олардың айтуы бойынша қазір шикізат мәселесі өте қиын және дүниежүзілік пандемияға байланысты кейбір жұмысшылардың саны аз, өндіріс көлесі көп. Сол себепті сұраныс көп болған сайын баға солай қымбаттап тұр дейді.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#қымбатшылық #қалтадан_қағылғандар #әлеумет

Видео Халық қашанғы тоналады? Құрылыс материалдарының бағасы 200-300 пайызға өсті канала Информбюро 31