Жігітін пышақтап өлтірген бойжеткен шартты түрде сотталды

Сүйіктісін пышақтап өлтірген бойжеткен сот залынан босап шықты. Бүгін облыстық қылмыстық істер жөніндегі мамандандырылған ауданаралық сотында осыдан 2 жыл бұрын болған кісі өліміне қатысты іске нүкте қойылды. Оқиға 2013 жылы болған. Содан бері бұл істі 4 тергеуші тергеп, екі жыл өткен соң ғана құпияға толы іс сотқа жетті. Тергеу Қылмыстық Кодекстің "Адам өлтіру" бабымен жүргізілді. Биыл Қылмыстық Кодекс өзгеріп, үкім "Қажеттi қорғаныс шегiнен шығу кезiнде жасалған кiсi өлтіру" бабымен шығарылды. Сөйтіп бүгін сот залынан Эльмира Асылжанова босап шықты. Ол жазасын бір жыл бойы шартты түрде өтейді. Жоламан Маймақов пен Эльмира Асылжарова кездесіп, туыстарының айтуынша, олар бір кездері бір үйде тұрған. Жастардың неліктен ажырасып кеткені белгісіз. Бір күні Эльмираны Жоламан қайта кездесуге шақырады. Екеуі гараж маңында жүздесіп, автокөлік ішінде жыныстық қатынасқа түскен. Сол сәтте Жоламанның өзге сүйіктісі телефон шалады. Қылмыстық істе көрсетілгендей, осы уақытта Эльмира жігітке асхана пышағын сұғып алған. Жәбірленуші қансырап, ауруханада көз жұмды. Оның туыстары бұл хабарды арада 2 күн өткен соң естіген. Бүгін шығарылған сот үкіміне Жоламанның туыстары өз наразылықтарын білдірді. Ал қайғыдан қан жұтқан анасы үкімге қатысты апелляциялық шағым түсірмек. Ол үкіммен мүлде келіспейді. Айта кетейік, сотталушы қыз Марат Оспанов атындағы Батыс Қазақстан мемлекеттік медициналық университетінің студенті. Қаза болған Жоламан да, сот залынан босап шыққан Эльмира да 25 жаста.

Видео Жігітін пышақтап өлтірген бойжеткен шартты түрде сотталды канала РИКА ТВ