«Түкке қатысым жоқ». Тұрсынбек Қабатов қызының ҰБТ-дағы былығы туралы

Басы даудан арылмаған танымал шоумен Тұрсынбек Қабатов өзінің де, қызының да ҰБТ-дағы былыққа түк қатысы жоқ екенін айтты. Арнамызға эксклюзив сұқбат берген әртіс бүгін қызы дайындалған білім орталығына ҰБТ-дан шеттетілген өзге де үш түлектің ата-анасын іздеп келді. Бірақ, Қабатовпен жақсы араласамын деген орталықтың директорын Тұрсынбектің өзі танымайтын болып шықты. Ал, Нұрбек Қанай есімді жігіт қылмыс жасағанын толық мойындап, бұл әрекетке не үшін барғанын,8 бірдей жалған куәлікті қалай жасағанын айтып берді.
Бауыржан Жәдігеров Тұрсынбек Қабатовпен жақсы араласамын десе, Қабатов бүгін бұл жігітті бірінші рет көріп тұрмын дейді. Екеуі қызылкеңірдек болып біраз дауласты. Кімдікі ақиқат екені тек өздеріне аян. Бірақ, танымал шоумен Бауыржан Жәдігеровті де, қызымды дайындаған Нұрбек Қанайды да мүлдем танымаймын деп отыр.
ТҰРСЫНБЕК ҚАБАТОВ, шоумен:
– Осы 140+1 мектебінде қызымның оқитынын білемін. Сол жерден ЕНТ-ға кеткенін де білемін. Қызым ЕНТ-ға кірді. Қызым ЕНТ-ны тапсырды. Бірақ ішіндегі жаңағы болып жатырған былықты жасаған кім екенін мен білмеймін! Жалған құжатты жасаған жаңағы Нұрбек па кім екенін білмеймін мен.
Қызының ҰБТ тапсырғанына 1 айдан асып, қылмыстық іс 13 маусымда тіркелсе де, Тұрсынбек Қабатов бұл дауға енді кірісіп жатыр. Ал математик Нұрбек Қанай Әдемі Аманғали мен тағы үш түлектің орнына басқа адамды кіргізгенін мойындады. Сондағы мұғалімнің бар мақсаты - жоғарғы балл әперіп, миллиондаған оқырманы бар Тұрсынбек Қабатовтың инстаграмында жарқ етіп көріну екен.
НҰРБЕК ҚАНАЙ, мұғалім:
– Әдемі жоғары балл алса ертең мен өзімнің авторитетімді көтеру үшін істедім. Просто процес былай ғой: Әдемінің фотосына Сымбаттың фотосын қоямын, просто ауыстыра саламын. Қалған ештеңені өзгертпеймін.
Осылайша 13 маусымдағы ҰБТ-да Әдемі Аманғалидің орнына Нұрбек Қанайдың туған қарындасы Сымбат Қанай, Саодат Алиеваның орнына Дана есімді қыз, Бексұлтан Қаршығаның орнына Нұрлыбай, Күзенов Темірланның орнына Нұрислам тест тапсыру керек болған. Жоғары балл алып беруге келіскен олардың барлығы студент.
НҰРБЕК ҚАНАЙ, мұғалім:
– Оригиналдарымен кірді. Әдемі Әдемі болып, Сымбат - Сымбат болып кірді. Тексерушілер көреді да: аа, жақсы деп кірді. Кіргеннен кейін логин, пароль береді ғой. Логин, пароль бергеннен кейін ауысып кетеді бір-бірімен. Сөйтіп ауысып кеткеннен кейін отырып, тапсырып жатқан кезде Сымбаттың орнына Әдемі отырып қойды ғой. Егер тексерушілер келіп жатса тексеріп жататын болса клавиатураның астында удостоверение бар. Прост соны шығарып қойыңдар да Әдемі Сымбат болып отыра бер деген мәселе ғой!
Бірақ, көп ұзамай 102-ге қоңырау түсіп, сегіз адам ҰБТ-дан шығарылған. Нұрбек Қанай идеяны 4 түлектің ата-анасы білмейді дейді. Оған қазір қылмыстық іс қозғалған. Кінәмді мойындаймын деген Нұрбек Қанай қандай жазаға тартылатыны әзірге белгісіз. Ал, шоумен Тұрсынбек Қабатов бұл жайтты адвокат Абзал Құспан пост жариялағанда ғана білдім деп отыр.

Айбар Төлжанұлы, Дидар Елеуов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#ТұрсынбекҚабатов #ӘдеміАманғали #ҰБТ #дау

Видео «Түкке қатысым жоқ». Тұрсынбек Қабатов қызының ҰБТ-дағы былығы туралы канала Информбюро 31