Atronos: Ordinary Heroes, -The Story of Wessenyelesh Debela : Part 1

የአዘቦት ጀግኖች (Ordinary Heroes) ዜጎች ተከታታይ መሳጭ ታሪኮች በአትሮኖስ
እንደምንድናችሁልን የተወደዳችሁ የአትሮኖስ ታዳሚያን፣ በአትሮኖሳችን፣ ያልተነጋገርንባቸውን ጉዳዮች ፊት ለፊት ለማምጣት፣ ችላ ያልናቸውንም አገራዊ የታሪክ፣ የፖለቲካና የማህበረሰብ ጭብጦች ተገቢው ዋጋና ትኩረት እንዲሰጣቸው የምንጥርበት፤ አዲስ ፈለግ የምናስስበት ዝግጅት መኾኑን ለእናንተ መንገር መቼስ ጥቂት ግር ያሰኛል፡፡ በሚገባ ታውቁታላችሁና፡፡ ኾኖም፣ አሁንና ከአሁን በኋላ ለሚቀላቀሉን ታዳሚዎቻችን መጠቆሙ ግን አይከፋም፡፡
የሀገራችንን ትላንት ያለአርትኦት ለማየት እንዲያስችል፤ የኢትዮጲያችንን ሁለንተናዊ ስብጥርና ህብር ለመረዳት እንዲበጅ፤ በአትሮኖስ እጅግ አስደናቂ የዜጎችን እውነተኛ ታሪኮች በተከታታይ ማቅረብ ጀምረናል፡፡ ዛሬም በቀጣይነት የምናቀርበውን ተረክ የመጀመሪያ ክፍል ይዘናል፡፡
የሀገራችን ታሪክ ከትላንት ስህተት ተምረን ዛሬን ለማስተካከልና ነገን ለማሸብረቅ የሚያስችል መኾኑ ቀርቶ፤ ርዕዮተ-አለማዊ ሻሞላ የሚመዘዝበት የውጥንቅጥ ፖለቲካችን የጦርነት አውድማ ኾኖ ይታያል፡፡ እስካሁንም የፖለቲካ ድርጅቶች፣ የየድርጅቶቹ የአመራር አባላት፣ የመንግስት ባለስልጣናት፣ የሊግ ወይም የማህበራት ልሳናት ወዘተ፤ ሌላውን ተጠያቂ እያደረጉ “እውነታችን ታሪካችን” ያሉትን ጽፈዋል፤ ተናግረዋል፡፡ በየሰልፉና ግዳጁ፣ በመሳደዱና እልቂቱ ውስጥ የነበሩት ግለሰቦች ወይም ዜጎች ግን ዛሬም ድረስ በቂ የመናገርያ መድረክ አላገኙም፡፡በመኾኑም፣ ዜጎች፣ ተራ አባላትና ነዋሪዎች በድርጅት ጭምብል ሳይከለሉ፣ ድርጅታችን፣ ተቋማችን፣ መንግስታችን ወዘተ ሳይሉ፣ እራሳቸው በግል የተጓዙትን ጉዞ፣ የዋሉ ያደሩበትን፣ የተካፈሉትን አውደውጊያም ኾነ ጉባኤ፣ ያለፉበትን መከራም ኾነ ደስታ በሚያውቁትና በእራሳቸው እይታ ልክ ብቻ እንዲተርኩ እናደርጋለን፡፡ ይህም ስለታሪካዊ ፍጻሜዎቹ አዲስ ሥዕል መስጠት ከመቻሉም በተጨማሪ፣ እርግጥ በጊዜውና በቦታው የነበረውን ኹኔታ በቅርበትና በተሻለ ጥራት ለማየት ይረዳል ብለን እናምናለን፡፡ በእነኚህ ተከታታይ ዝግጅቶች አስገዳጅ ኾኖ ጥያቄ መጠየቅ ካላስፈለገን በቀር የእኛን ጣልቃ ገብነት ቀንሰን መድረኩን የምንተወው ለባለታሪኮቹ ነው፡፡ እኛም እናንተም የየታሪካቸውን ሀዲድ እየተከተልን ልብ ሰቅዞ የሚይዝ የህይወት መንገዳቸውን አብረናቸው እንጓዛለን፡፡ ደስ እንደምትሰኙም ተስፋ እናደርጋለን፡፡
የዛሬው ባለታሪካችን ወይዘሮ ወሰንየለሽ ደበላ ናት፡፡ ነዋሪነቷ እዚህ በዩናይትድ እስቴትስ ነው፡፡ ከዛሬ ጀምሮ በየሳምንቱ በተከታታይ ክፍል፣ የቤተሰቧን የኢትዮጲያ መልክ፣ ከሞት ለማምለጥ የተሽሎከሎከችበትን፣ ከአዲስ አበባ እስከ ሰሜን በረሃዎች የተንከራተተችበትን አስደናቂ ታሪክ ከኋላ አንስታ ታስጉዘናለች፡፡
ክቡራትና ክቡራን፣ ወሰንየለሽ ደበላ የምታጋራንን ታሪክ እየተከታተላችሁ ሐሳቦቻችሁን ትሰጡ ዘንድ በክብር ተጋብዛችኋል፡፡ ወይዘሮ ወሰንየለሽ ደበላ የሚያስደምም የህይወት ጉዞዋን በአትሮኖስ በኩል በተከታታይ ታወጋችኋለች፡፡ ይህንን ለማድረግ መልካም ፈቃዷ ስለኾነም እናመሰግናታለን፡
ይህ የርዕዮት አትሮኖስ ነው፡፡ እነሆ የዛሬው፡፡

Видео Atronos: Ordinary Heroes, -The Story of Wessenyelesh Debela : Part 1 канала Reyot