ЧУБАК АЖЫ ЖАЛИЛОВ ДҮЙНӨДӨН КАЙТТЫ

Коронавирус илдети кыргыздын кыраан инсандарын да аяган жок. Белгилүү дин аалымы, Кыргызстандын мурунку муфтийи Чубак ажы Жалилов дүйнө салды. Аалым түндө оор абалда Улуттук госпиталга жеткирилип, ошол жактан көз жумган. Дарыгерлердин айтымында, Чубак ажы өпкөсү кагынып, буга чейин үйүндө дарыланып жаткан. Экс-муфтий 1975-жылдын 21-январында Жалал-Абад облусуна караштуу Базар-Коргон районундагы Бай-Мундуз айылында төрөлгөн. Жогорку билимдүү. Азирети Умар атындагы Кыргызстан ислам университетин аяктаган. Чубак ажы Жалилов араб тилинин грамматикасы, хадис таануу илимдери боюнча окутууга, фатва чыгарууга уруксаты бар кыргыз диниятчысы катары таанымал эле. Интернет жана маалымат технологиясын пайдалануу менен мусулман жамаатына дарс окучу. Дайыма кыргыз калпагын жана чапанын кийип, улуттук баалуулуктарды туу тутуп келген. Жетинчи каналдын жетекчилиги жана жамааты жалпы мусулман коомчулугуна, маркумдун жакындарына жана үй-бүлө мүчөлөрүнө терең кайгыруу менен көңүл айтат.

Видео ЧУБАК АЖЫ ЖАЛИЛОВ ДҮЙНӨДӨН КАЙТТЫ канала Sky News