Қирғизистон Олий суди ўзбек фаолни бир умрлик қамоқда қолдирди

Қирғизистонда бир умрга қамалган ўзбек ҳуқуқ фаоли қамоқда қолади.

Бишкекда мамлакат Олий суди Азимжон Асқаровнинг кассация тартибидаги аризасини қўриб чиққан ва бир умрлик қамоқ ҳукмини ўз кучида қолдирган.

"Ҳакам қарорнинг фақат якуний қисмини ўқиди. Биз унинг нимага асосланганини билмаймиз" - дейди унинг ҳимоячиси Валерян Вахитов.

Ҳимоячининг айтишича, Олий Маҳкама Азимжон Асқаров ишига сўнгги нуқтани қўйган, яъни мазкур қарор юзасидан шикоят қилинмайди.

Бундан кейин ҳуқуқбон иши фақат инсонийлик юзасидан қайта кўриб чиқилиши мумкин холос.

Азимжон Асқаров 2010 йилнинг июнида Ўш ва Жалолободда юз берган миллий низода иштирок этиш ва милиция ходимини ўлдиришга оид айбловлар билан бир умрлик қамоқ жазосига ҳукм этилган.

Азимжон Асқаров ҳар доим айбловларни рад этиб келган.

Халқаро инсон ҳуқуқлари ташкилотлари ва кузатувчилар Азимжон Асқаров ноҳақ қамалиб, қийноқларга солинганини айтиб, унга қўйилган айбловлар исботини топмаганини айтишади.

Судда иштирок этган Азимжон Асқаровнинг рафиқаси Ҳадича Асқарова ўз турмуш ўртоғи иши юзасидан адолатсиз суд жараёни бўлиб ўтган деган фикрда.

"Жараён бошланишидан аввал, жабрланувчи тараф, дейилган одамлар жанжал қилишди. Адвокатларни, мени ҳақоратлашди" - дейди рафифаси Хадича Асқарова.

"Жараён тартибсиз ўтди. Суд адолатли ҳукм чиқармади. Мен қарордан норозиман" - дейди ҳуқуқбоннинг рафиқаси.

Унинг сўзларига кўра, 68 яшар Азимжон Асқаровнинг соғлиги кундан кунга ёмонлашиб бормоқда.

Халқаро кузатувчилар ва гувоҳларга кўра, 2010 йил июнь ойидаги Ўш ва Жалолобод қирғинида асосан ўзбеклар ҳужумга тутилган ва жабр кўрган.

Лекин Қирғизистон яна аксар ўзбекларни жазога тортгани айтилади.

Азимжон Асқаровнинг рафиқаси Хадича Асқарова.

BBC News O'zbek - BBC News O'zbek tilida, onlayn, TV va ijtimoiy tarmoqlarda

Видео Қирғизистон Олий суди ўзбек фаолни бир умрлик қамоқда қолдирди канала BBC News Uzbek