ҲАБСИ РОҲБАРИ ТАРАБХОНАИ “ХУМАЙНӢ” БАРОИ ҒАЛОҒӮЛАИ МУШТАРИЁНАШ

РВКД Душанбе хабар дод, ки дар асоси муроҷиати як сокини пойтахт Соҳибназар Алиев, роҳбари тарабхонаи “Хумайнӣ” дар мазаллаи Гипрозем дар ҷануби пойтахти Тоҷикистонро бо ҷурми вайрон кардани талаботи шаҳрдорӣ ба ҷавобгарӣ кашондаанд. Соҳибназар Алиев бо қарори додгоҳ ба 5 шабонарӯз ҳабси маъмурӣ маҳкум шудааст.
РВКД гуфт, як сокини пойтахт ба мақомоти милитсия хабар дода буд, ки маъмурияти ин тарабхона берун аз вақти муқарраргардида низ фаъолияташро идома дода, дар бевақтии шаб бо овози баланду гӯшхароши мусиқӣ ва дашному ҳақоратҳои мизоҷони худ оромии шаҳрвандону сокинони маҳалларо халалдор ва тартиботи ҷамъиятиро дар вақти шабона пайваста вайрон менамояд.
Милитсияи пойтахт исми ин сокинро наовардааст, вале чанд рӯзи охир дар шабакаҳои иҷтимоӣ аз шавқуну ғалоғӯлаи муштариёни ин тарабхона журналисти шинохта Раҷаби Мирзо шикоят мекард. Ӯ навишта буд, дар ҳоле ки шаҳрдории Душанбе баъди соати 23 фаъолият кардани тарабхонаҳоро манъ кардааст, ин тарабхонаи воқеъ дар Гипрозем баъди соати 24 ва гоҳо соатҳои яку дуи шаб ҳам боз аст ва доду войи мизоҷонаш мардумро намегузорад, ки ором хоб раванд.

Видео ҲАБСИ РОҲБАРИ ТАРАБХОНАИ “ХУМАЙНӢ” БАРОИ ҒАЛОҒӮЛАИ МУШТАРИЁНАШ канала Bomdod TV