БАРОДАРИ ВАЗИРИ ДОХИЛА НИЗ МАНСАБИ НАВ ГИРИФТ: ТАФСИЛОТИ ТАҒЙИРОТИ КАДРИИ РӮЗИ 21 ФЕВРАЛ

Рӯзи 21 феврал бо фармонҳои президент ва қарорҳои ҳукумати Тоҷикистон вазири маориф ва илм, муовини аввал ва муовинони вазири маориф ва илми Ҷумҳурии Тоҷикистон “бо сабаби ба кори дигар гузаштан” аз вазифа озод гардида, Саидзода Раҳим Ҳамро — вазири маориф ва илм, Ҷӯразода Ҷамшед — муовини якум, Хайрзода Шукрулло ва Абдухолиқзода Лутфия — муовинони вазири маориф ва илми ҷумҳурӣ таъин гардиданд. Ҳамчунин, Шоҳин Саидзода аз роҳбарии Агентии назорати давлатии соҳаи маориф ва илм ва Икромӣ Хуршед аз вазифаи директори Маркази миллии тестии назди Президенти Ҷумҳурии Тоҷикистон низ “бо сабаби ба кори дигар гузаштан”озод гардида, Ҷаъфарзода Сабзаалӣ — директори Маркази миллии тестӣ таъин гардид. Феълан маълум нест, ки ба ҷои Шоҳин Саидзода кӣ таъйин шуда ва худи ӯ ва Хуршед Икромӣ ба кадом мақоми наве таъйин шудаанд?
Ҳамин тавр, Раҳимзода Раҳмоналӣ Ҳамро муовини директори Агентии назорати маводи нашъаовари Тоҷикистон таъин карда шудааст. Ӯ бародари калонии вазири корҳои дохилӣ Рамазон Раҳимзода аст. Хадамоти матбуоти президент бидуни овардани номи Раҳимзода танҳо хабар додааст, ки “муовини директор ва сардорони якчанд раёсатҳои Агентии назорати маводи нашъаовари назди Президенти Ҷумҳурии Тоҷикистон аз ҳисоби мутахассисони соҳибтаҷрибаву кордон таъин гардиданд”. Раҳимзода Раҳмоналӣ солҳои ахир сардори Раёсати ташкилоти мубориза бо ҳуқуқвайронкунии гумрукии Хадамоти гумруки Тоҷикистон буд.
Бо қарорҳои ҳукумат ҳамчунин Раҳимзода Шабнам - муовини якум, Чоршанбезода Сураҷ ва Собирзода Парвиз - муовинони раиси Кумитаи ҷавонон ва варзиш таъин гардидаанд.
Ҳаимн тавр, президент Мирзозода Абдуқаҳҳор ва Маҳмадализода Маҳмуродро ба вазифаҳои сараудиторони Палатаи ҳисоб пешниҳод карда, Темур Бойзодаро аз мақоми муовини якуми раиси суди вилояти Хатлон озод кардааст.
Хадамоти матбуоти президент афзуд, рӯзи 21 феврал дар мувофиқа бо президент сардорони як қатор раёсатҳои Хадамоти гумрук дар гузаргоҳҳои сарҳадӣ ва раёсатҳои маорифу тандурустии вилояти Хатлон иваз карда шуданд.
Эмомалӣ Раҳмон дар мулоқот бо кадрҳои навтаъйин масоили ислоҳоти соҳаи маориф, беҳтар намудани сифати таълиму тарбия, интихобу ҷобаҷогузории дурусти кадрҳои соҳаҳои илму маориф, тарбияи насли ҷавон дар рӯҳияи илмомузӣ ва бедор кардани завқи толибилмон ба омӯзиши илмҳои замонавӣ, ҳавасманд кардани омӯзгорони ҷавонро матраҳ кардааст. Ӯ аз кадрҳои навтаъйин хост, ки дасту дили пок ба нафъи давлату миллат фаъолият кунанд.

Видео БАРОДАРИ ВАЗИРИ ДОХИЛА НИЗ МАНСАБИ НАВ ГИРИФТ: ТАФСИЛОТИ ТАҒЙИРОТИ КАДРИИ РӮЗИ 21 ФЕВРАЛ канала Bomdod TV