МИСЛИ ҒУЛОМЕМ! АҲВОЛИ ХОРУ ЗОРИ МУҲОҶИРОНИ ТОҶИК ДАР ВИЛОЯТИ ОРЕНБУРГИ РУСИЯ

Ин 7 муҳоҷир аз ноҳияи Абдураҳмони Ҷомиро, ки дар вилояти Оренбурги Русия 5 моҳ боз дар шароити ғуломӣ бепул кор мекарданд, рӯзи 16 декабр Шаҳоб Шарипов, писари ҳомии шинохтаи ҳуқуқи муҳоҷирони тоҷик равоншод Каромат Шарипов, аз дасти корфармои золимашон халос кардааст. Аз ин 7 муҳоҷир 3 нафар ҳамроҳи Шаҳоб Шарипов ба шаҳри Маскав омада, алакай дар инҷо бо ҷойи кору ҷойи хоб таъмин карда шудаанд. Вале 4 нафари дигар баъди гирифтани паспортҳояшон аз дасти корфармо тасмим гирифтаанд, ки дар ҳамон вилояти Оренбург барои худ ягон ҷойи кори дигар биҷӯянд.
Яке аз нафарони наздик ба Шаҳоб Шарипов рӯзи 18 декабр дар суҳбат бо пойгоҳи хабарии “Бомдод” гуфт, ин муҳоҷирони тоҷикро як ҳамватани худашон бо номи Муртазо Наботов бо ваъдаи 40-45 ҳазор рубл музди моҳона аз Тоҷикистон ба вилояти Оренбург оварда, дар як вагони барои зиндагӣ номуносиб ҷой кардааст ва дар тӯли 5 моҳ дар сохтмон бепул кор фармудааст. Ба гуфтаи муҳоҷирон, дар тӯли ин 5 моҳ онҳо ҳамагӣ як маротиба ва он ҳам ҳамагӣ 20-ҳазорӣ пул гирифтаанд ва дигар тамоми ин муддат бепул кор кардаанд.
Дар як видеое, ки қаблан ин муҳоҷирон ба ҳомиёни ҳуқуқ фиристода, хостори наҷот додани онҳо аз дасти корфармои золим шуданд, онҳо шароити хеле бади вагонеро, ки онҷо зиндагӣ мекарданд, нишон медиҳанд, ва мегӯянд, Муртазо Наботов нафақат маоши онҳоро намедиҳад, балки шиносномаҳои ҳамаашонро ҳам гирифтааст ва иддао дорад, ки онҳо гӯё то ҳол пули қарзи роҳкирою патенташонро дар пеши вай адо накардаанд.

Видео МИСЛИ ҒУЛОМЕМ! АҲВОЛИ ХОРУ ЗОРИ МУҲОҶИРОНИ ТОҶИК ДАР ВИЛОЯТИ ОРЕНБУРГИ РУСИЯ канала Bomdod TV