Қорғалжындағы Наурыз мейрамы!

Ұлыстың Ұлы күні Қорғалжында!
Күн мен түннің теңеліп, көктемнің алғашқы шуағы төгілген ең ұлық мереке – Наурыз мейрамы халқымыз үшін қашан да қастерлі мерекелердің бірі. Қойнауы құтқа толы, сулары құсқа толы киелі де қастерлі мекен – Қорғалжын өңірінің төрінде әз-Наурыз мерекесі тойлауда. Наурыздың 14-нен бастау алған мерекелік шаралар әрбір елді-мекендерде өткізіліп, енді міне, бүгін аудан орталығында ақшаңқаң киіз үйлер тігіліп, сол киіз үйлердің қатарында сауда орындары бой түзеп, палуандар үшін боз кілем төселіп, өнерпаздар үшін арнайы сахна қойылды. Мереке басталмас бұрын саудагерлер әдетінше сауда-саттықты бастап жіберіп, «құстың сүтінен» өзгенің барлығы жәрмеңкеленді. Ет, балық, сүт өнімдері бүгінгі сауданың көркін қыздырып тұрды. Қаз-қатар тізілген киіз үйлер сонадайдан «мен мұндалап» тұрып, өзінің маңайына адамдарды шақырып тұрғандай әсер қалдырды. Мерекенің басты қызығы – күрес сайысы да басталуға сәл-ақ қалып, Қорғалжын аудандық балалар мен жасөспірімдер спорт мектебінің жаттықтырушылары өтінім білдірген жастардың барлығын жазып, оларды жас ерекшеліктеріне және де салмақтарына қарап бөліп жатты. Олардың қатарында қол тіресу сайысы да өтіп жатты. Мерекелік шаралардың көркін қыздырып тұрған тағы бір көрініс – аудан өнерпаздарына арналып жасалған сахна маңынан шыққан әуезді, ырғақты әуендер еді.
Сағат 11-ден сәл асқанда мерекелік шараның ресми бөлімі басталып, аудан әкімі Қайыр Рыскелдінов Ұлыстың Ұлы күні – әз-Наурыз мерекесіне орай аудан тұрғындарына арналған өзінің құттықтау лебізін жеткізді. Аудан басшысының құттықтау сөзінен кейін аудан өнерпаздарының қатысуымен мерекелік концерт басталып та кетті. Асқар Сәдуақасов, Еркеназ Нәкен, Мақсат Әбзелов, Ләззат және Дана Құсайыновалар, Төрехан Тәжин ән шырқап, аудан жұртшылығына мерекелік көңіл күй сыйлады.
Сахнаға қарама-қарсы бұрышта аудандық электр желілері мекемесінің ұжымы аудан жұртшылығына арнап ыстық палау мен Наурыз көжені тегін таратты. Олардың қатарында «Қазақтелеком» ғимараты алдында ауданымыздың маңдайалды мекемелерінің ұйымдастыруымен «Бауырсақ фестивалі» өткізілді.
Қатар-қатар тізілген ақшаңқаң киіз үйлердің ең мықтылары анықталып, осы киіз үйлер арасындағы сайыс та жүріп жатты. Сабынды және Қарашалғын ауылдық округтерінің ортақ киіз үйінде жерлесіміз, он саусағынан өнер тамған ақын апайымыз, Қарғалы ауылының тұрғыны Сейсембаева Баян Амангелдіқызының қолөнер туындылары көпшілік назарына ұсынылды.
Мерекелік концерт аяқталғаннан кейін «Ең үздік киіз үй» номинациясының жеңімпазы да анықталды. Ол – «Достық» орта мектебінің құрған киіз үйі. Екінші және үшінші орынды Қорғалжын мектеп-гимназиясы мен Кеңбидайық және Арықты ауылдық округтерінің киіз үйлері өзара бөлісті. Сайыстың бас жүлдесіне 50 мың теңге тігілді. Екінші орынға 30 мың, үшінші орынға 20 мың теңге, ынталандыру сыйлықтарына 10 мың теңгеден үлестірілді.
Осылайша аудан орталығында Наурыз-думан өте қызықты әрі әсерлі өтті. Ауа-райының салқындығына қарамастан аудан жұртшылығы белсенділік танытып, тұрғындар алаңға көптеп жиналды. Мерекелік шаралар аудан көшелерінде әлі де жалғасуда.
статья взята тут : https://vk.com/korgalzhyn1928?w=wall-124613573_1215

Видео Қорғалжындағы Наурыз мейрамы! канала #Қорғалжын. Артём Еськов-Басс