«Арман жолында» телехикаясы желтоқсан айында көрерменге жол тартады

Отандық телехикаялардың қатарына тағы бір туынды қосылды.

Жуырда көрерменге «Хабар» Агенттігінің тапсырысымен түсірілген «Арман жолында» телехикаясы жол тартады. Бұл көркем туындыда еліміздегі велоспорттың дамуы дәріптеліп, қоғамдағы әлеуметтік мәселелер көтеріледі.

Сценарий бойынша атасының қолында өскен ауыл баласының арманы – велошабандоз болу. Алайда болашақ чемпионның мақсатына жету жолында әртүрлі кедергілер туындайды. Басты кейіпкер 17 жастағы Арманды жас актер Жасұлан Көпберген ойнайды.

Баланың шапшаңдығы кездейсоқ кетіп бара жатқан жаттықтырушының назарына ілінеді. Анасының сырқаттанып қалғанын естіген Арман ауруханаға қарай жүйткіп бара жатып, кәсіби велошабандоздардан озып кетеді. Дәл осы сәтте оның арманына жетуге жол ашылады.

Жасұлан Көпберген, актер:
- Рөл өзіме жақсы келді. Өзім сияқты ауылда өскен, арман қуып қалаға келген. Велосипедпен қиын болды.

12 бөлімнен тұратын телехикая екі айда түсірілген. Қазір кадрларды жинақтау жұмыстары жүріп жатыр. Фильмнің мақсаты – еліміздегі велоспорттың дамып келе жатқаны, оған қызығушы жастардың бар екенін көрсету. Мұнда жастар тәрбиесі және басқа әлеуметтік мәселелер де көрініс табады.

Ардагер Сантыбаев, «Арман жолында» телехикаясының продюсері:
- Бұл телехикая спортты ғана дәріптемейді. Сонымен қатар отбасы құндылықтарын көрсетеді. Әкесінен ерте айырылған баланы атасы спортқа баулиды.

«Арман жолында» телехикаясы «Хабар» арнасынан желтоқсан айынан бастап көрсетіледі.

Авторлары: Аршын Кемелжан, Сержан Жұмабаев

Видео «Арман жолында» телехикаясы желтоқсан айында көрерменге жол тартады канала Khabar NEWS