Жемқорлықпен ұсталып сотталса да, аз уақытта босап шығатын шенеуніктер

Соңғы жылдары түрлі деңгейдегі лауазым иелері мемлекет қаржысын жымқырды деп айыпталып, қамалып жататынына көз үйренді. Ал, жемқорлық күдігімен ұсталып, бірақ онысы дәлелденбей қалатын кездер сирек. Сөйтсе де, бүгін Қарағанды қаласы, Қазыбек би аудандық соты бұрынғы Энергетика вице-министрін ақтау туралы шешім шығарды. Өйткені, шенеуніктің кінәсі дәлелденбепті.
Қазіргі қоғам әлдебір «шенеунік қомақты қаржы жымқырды» деген күдікке ілікті десе, таң қалмайды. Әсіресе, соңғы жылдары мұндай жаңалық тіпті көбейіп кеткен. Бірі 10, енді бірі 5 жылға сотталып, бірақ жыл өтпей босап шығатындары да бар. 2 жыл бұрын аса ірі көлемдегі мемлекет қаржысын жымқырды деп энергетика вице-министрі қамауға алынды. Мемлекеттік айыптаушы соттан шенеунікті 10 жылға бас бостандығынан айыруды сұрады. Бірақ бүгін сот Анатолий Шкарупаны ақтау туралы үкім шығарды. Өйткені, шенеуніктің кінәсін дәлелдейтін нақты құжаттар болмапты. Сондықтан, бұрынғы вице-министр мен екі кәсіпкер ақталып шыққан.
ЖАНАТ ЕГЕМБЕРДИЕВА, Қарағанды қаласы Қазыбек би аудандық сотының судьясы:
– Айыптау актісінде қылмыстың қалай жасалғаны көрсетілмеген. Қаржы қандай жолмен ұрланғаны да айтылмаған. Яғни, ақшаны жымқырғанын немесе тиімсіз жаратқанын дәлелдейтін құжат жоқ. Ал сарапшылардың келтірілген шығын көлемі жайлы ұсынған дәйектерін де сот қараған жоқ. Өйткені, айыпталушылардың кінәсін дәлелдейтін нақты құжаттар болмады.
Ал осыдан бір апта бұрын тағы бір шулы ақпарат тарады. Телеграмдағы «Чиновник» парақшасында Алматы қалалық жайлы орта басқармасының басшысы Сапар Нұрышевтың ұсталғаны туралы ақпар жарияланған. Ол модульдік аурухана құрылысына бөлінген қаржының бірнеше миллиардын жымқырды деген. Алайда, ақпарат расталмады. Қала әкімінің баспасөз қызметі елді дүрліктірген хабарламаның жалған екенін айтып, Сапар Нұрышев жұмыс орнында отырған бейнежазбасын көрсетті.
Былтыр Алматы облысы әкімінің орынбасары Бағдат Манзоровтың қамауға алынғаны айтылды. Алғашында, шенеуніктің не себепті ұсталғаны туралы ақпар болған жоқ. Кейін әкім орынбасарына алаяқтық бабы бойынша айып тағылғаны анықталды. Сол кезде шенеунік біресе жұмыста жүрген болды, біресе емделді, кейін уақытша қамауға алынып, көп өтпей тағылған айыптың бәрінен ақталып шықты. Әрине, мұндай түсініксіз жайттар кездесіп тұрады. Бірақ билік өкілдері көбіне бұндай оқиғаларға дер кезінде түсінік бермей, ел ішіндегі қауесетке өздері жол береді.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#шенеуніктер #жемқорлыққа_жол_жоқ

Видео Жемқорлықпен ұсталып сотталса да, аз уақытта босап шығатын шенеуніктер канала Информбюро 31