Dərsi döyüş meydanında keçdi - ŞƏHİD MÜƏLLİM QOŞQAR ÖMƏROV

44 günlük Vətən Müharibəsində qanı ilə dastan yazanlardan biri də şəhid müəllim Qoşqar Ömərovdur. Sentyabrın 22-də “Vətən çağırır” deyərək hərbi xidmətə yollanan 26 yaşlı Qoşqar Şuşanın Daşaltı kəndində şəhid olub. Atası Səxavət Ömərov deyir ki, ondan geriyə şəkilləri, bir də acıyla qüruru eyni anda yaşayan ailəsi qalıb: “Ata üçün oğlunu itirmək nə qədər ağır olsa da, eyni zamanda qürurvericidir. Ona görə ki, vətən uğrunda şəhid olub. Özümüz ata-oğul söhbət edəndə vətənimizin torpaqlarının itirilməsi onun üçün böyük zərbə olmuşdu. Həmişə görürdüm ki, onda vətənpərvərlik hissi yüksək səviyyədədir. Sentyabr ayının 21-i “Vətən məni çağırır” deyə hərbi komissarlığa yollandı, Füzuli rayonu istiqamətində döyüşə atıldı, Qubadlıya qədər getdi. Sonra Şuşa uğrunda gedən döyüşlər zamanı şəhid oldu. Vətən sağ olsun!”

Şəhidin qardaşı Fikrət Ömərov deyir ki, Qoşqar onun üçün həm də sirdaş olub: “Qardaşım mənim üçün təkcə qardaş deyildi, ürəyimi açdığım sirdaş idi. Uşaqlıqdan onun ürəyində vətənə sevgi vardı. Müharibə başlayanda özü də təkid etdi ki, mən getməliyəm. Çağırılan kimi ön sıralara qoşularaq getdi. Döyüşlərdə iştirak etdi, Şuşada şəhid düşdü”.

Qoşqarın nənəsi Sevil Ömərova da nəvəsi ilə qürur duyur: “Vətən məni çağırır, mən getməliyəm” - bunu dedi. “Ağlar yarım qalmır, körpəm qalmır, mən gedirəm” dedi. Nə bilim, Vətən sağ olsun!”

Qoşqar Ömərov Abşeron rayonundakı 5 saylı Masazır kənd orta məktəbində riyaziyyat fənnini tədris edirmiş. Məktəbin direktoru Səlim Məmmədov onu nümunəvi müəllim və kollektivin sevimlisi kimi xarakterizə edir: “Bazar günü idi. Səhər mənə zəng vurdu ki müəllim, mən səhər saat 9-da Kürdəmir rayon hərbi komissarlığında olmalıyam. Məndən icazə istədi. Mən də icazə verdim. Oradan mənə zəng vurdu ki, cəbhə bölgəsinə gedirəm. Gözü, könlü hədsiz dərəcədə tox adam idi. Bilirsiniz ki, müəllimlərin əməkhaqqı onların dərs saatlarından asılıdır. Dərs saatı nə qədər çox olsa, əməkhaqqı yüksək olur. Biz dərs bölgüsü edəndə soruşurdum ki, nə qədər dərs deyə bilərsən, gücün nəyə çatır? Dedi ki, ilk olaraq qoy qadın müəllimlər götürsün, sonra mənə verərsiniz”.

Qoşqardan müəllim yoldaşlarına və şagirdlərinə qalan tək xatirə isə yarımçıq qalan tədris planı dəftərləri oldu: “Son danışığımız şəhid olmamışdan on gün öncəyə təsadüf etdi. O qədər qürurla danışırdı ki, elə bil ömrü müharibədə keçib. Qorxusu, çəkinməyi yox idi. Sanki sevinirdi. Sonra isə şəhid xəbəri gəldi. O hissləri ifadə edə bilmirəm (ağlayır). Qoşqar bizə şərəf qoydu getdi, ləyaqət qoydu getdi”.

Şəhidin müəllim yoldaşı, Qarabağ qazisi Ülvi Qədir isə Qoşqar Ömərovla son görüşünü belə xatırlayır: “Bizim sonuncu görüşümüz elə burda olmuşdu. Səhər gəldik məktəbə görüşdük. Pandemiya ilə bağlı müəyyən məhdudiyyətlər var idi, amma dərs bölgüsündə iştirak etdik. Sonra getdik çay süfrəsində oturduq. Döyüşlərin başlayıb-başlamaması haqqında fikir mübadiləsi apardıq. Heç ağlımıza gəlməzdi ki, Qoşqar döyüş meydanında belə şücaət göstərəcək. İnsan kövrəlməyə bilmir. Əminəm ki, indi bütün şəhidlərimizin ruhu şaddır, başda Qoşqar müəllim olmaqla”.

Dərs dediyi şagirdləri də müəllimlərinin şəhadəti ilə qürur duyurlar. Boğazı düyünlənə-düyümlənə müəllimi haqqında xatirələrini danışan Pərvanə kimi: “Qoşqar müəllim bizim üçün çox əziz müəllim idi. Dostcanlı, qayğıkeş idi. Dərsdə heç vaxt oturmurdu, ayaq üstə dərsi başa salardı. Söz verirəm ki, Qoşqar müəllimim kimi, mən də riyaziyyat müəllimi olacağam”.

Vətən Müharibəsində Qoşqar Ömərov kimi bir neçə müəllim də şəhid oldu. Onlar bu dəfə şagirdlərinə ixtisas dərsi yox, Vətən dərsi keçdilər. Özü də döyüş meydanında. Allah rəhmət eləsin!
Rəsmi facebook səhifəmiz: https://www.facebook.com/tvapaxeber
Rəsmi instagram səhifəmiz: https://www.instagram.com/apatvresmi/
Rəsmi twitter səhifəmiz: https://twitter.com/apatvofficial
#apatv #apaxeber

Видео Dərsi döyüş meydanında keçdi - ŞƏHİD MÜƏLLİM QOŞQAR ÖMƏROV канала APA GROUP