Lənkəranda ilk dəfə hinduşka təsərrüfatı yaradılıb

Cənub bölgəsində ilk dəfə Lənkəranda hinduşka təsərrüfatı yaradılıb. Rütubətli iqlim şəraitində bu quşu saxlamaq riskli olsa da, buna lazımi şərait yaradılaraq vacib şərtlərə əməl etməklə nail olunub. Təsərrüfatında 1500 hinduşka bəsləyən və yaxşı gəlir götürən rayon sakini gələcəkdə bu sahəyə daha çox diqqət ayırmaq fikrindədir.

Təsərrüfat sahibi Elşən Məmmədov : “Gəlir yeridir. Ölkəmizə tələbat var hinduşkaya. Cənub bölgəsində hinduşka yetişdirmək bir az çətin olduğuna görə biz sınaq keçirmişik. Bizim Neftçalada inkubatorumuz var. Oradan çıxır 2 aylığında gətirmişik bura. Yaxşıdı. Havaya dözdülər.”

Təsərrüfatçı deyir ki, qış fəslində yaşıl ot örtük olmadığından hinduşkalar 6 hektar ərazidə cücərdilmş buğda zəmilərində otarılır. Bölgənin rütubətli iqlimi və xəstəliklərə tutulma riski nəzərə alınaraq quşlara vitaminli yemlər də verilir.

Hinduşka otlaq quşudur. Otarılanda çəkisi daha çox arta bilər. Bu hinduşkalar 3-4 aylığındadır ki, bunların da çəkilsi 6-7 kq aralığındadır.

Təsərrüfat sahibinin dediyinə görə hinduşka daha çox qış fəslində yeyildiyindən hazırda alıcısı çoxdur. Bəslədikləri 1500 quşun az bir müddətdə çoxu satılıb. Erkək və dişi quşların ayrı alıcılıq dövrü var. Hazırda tələbat erkək hinduşkalaradır .

Təsərrüfat sahibi Elşən Məmmədov : “İndiki dekabr ayı erkək - xoruz hinduşka deyirlər – xoruz hinduşkaya tələbat çoxdur. Çünki xoruz hinduşka tez kökəlir bu ayları. Fərə isə fevral ayında çox olur tələbat. Çünki fərə fevraldan sonra, yanvardan sonra götürür ətini.”

Qiymətləri isə quşun ətinə, çəkisinə görə 35 manatdan 45-50 manatadək dəyişir. Təsərrüfatın sorağını eşidənlər elə bu ünvana üz tutur.

Alıcı Rafik Tahirov: “Uşaqlar hinduşka ətin xoşlayırlar. Ona görə hər il 10-15 dənə hinduşka alırıq. Bazarda qiymət bahadır. Kənd yerindən gəlib almaq aparmaq ucuz başa gəlir.”

Hinduşka saxlamağın gəlirli sahə olduğunu deyən sahibkar təsərrüfatında yeni inkubator sexi yaratmağı düşünür. O, bununla bağlı artıq sifariş də verib.

Видео Lənkəranda ilk dəfə hinduşka təsərrüfatı yaradılıb канала ARB Cenub