Балаңызды жазғы лагерьге тегін қалай жіберуге болады?

Елімізде биыл 2 миллион 300 мың оқушы жазғы лагерлерде дем алады. Ал ол үшін жалпы саны 11 мыңнан аса тынығу орны ұйымдастырылмақ. Әсіресе ата-анасынан айырылған, аз қамтылған және көпбалалы отбасылардың балалары мен мүмкіндігі шектеулі жасөспірімдерді сауықтыру орындарына тегін жіберу көзделген. Қазіргі уақытта тынығу лагерлері балаларды қабылдауға дайын ба? Аймақтардағы әріптестеріміз анықтап көрді. Әріптестер?
ЖАНАР ҚОЖАНОВА, тілші:
– Ақтөбе облысында он бес мың оқушы биыл жазғы лагерлерге ақысыз демалады. Бұл үшін жергілікті бюджеттен 368 миллион теңге бөлінген. Ақша аз қамтылған, көп балалы, атаулы әлеуметтік көмек алатын отбасылардың балаларына жұмсалады. Ал бұл санатқа жатпайтын балалардың ата-аналарына өз қалталарынан ақша төлеп жіберуге тура келеді.
АСХАТ ІЗБАСАР, Ақтөбе облыстық Білім басқармасы қосымша білім беру және тәрбие жұмыстары бөлімінің басшысы:
– Арнайы санатқа кірмейтін балаларды қала сыртындағы лагерлерге ата-аналар өз балаларын жібере алады. Оның бүгінгі таңдағы құны 50.000 мен 75.000 арасы. Одан бөлек бізде демеушілер бар. Үлкен ауқымды компаниялар. Демеушілер есебінен балаларды қамтуға өз қолдауларын білдіріп отыр. Біздің есебіміз бойынша 24.000-ға жуық бала қала сыртындағы жазғы лагермен қамтылатын болады.
Қазір облыс бойынша 9 лагерь балаларды қабылдауға сақадай-сай отыр дейді әкімдіктегілер. Оның біреуі демалыс маусымын бүгін ашса, қалғаны үш күннен кейін бастайды.
ЕРЛАН ҚУАНДЫҚОВ, тілші:
– Шымкенттегі жазғы лагерьлер бірінші маусымнан бастап балаларды қабылдап жатыр. Биыл қаланың 186 мыңнан астам оқушысы жазғы демалыс орындарына 10 күннен жолдама алған. Лагерьлерде балалардың тынығып, уақыттарын көңілді өткізуге бар жағдай жасалған. Үш мезгіл ыстық астан бөлек, екі мәрте қосымша жеңіл тамақтануы да бар. Тәлімгерлерден бөлек, аға тәлімгер, медицина қызметкері, спорт жетекшісі мен бассейнге жауапты мамандар да қарастырылған.
БАҚЫТЖАН МҰСТАПАЕВ, Шымкент қаласы оқушылар сарайының директоры:
– Таңғы сегізден тұрып жаттығу жасайды, азанмен жаңағы дене қимылдарын. Одан кейін біз алты үйірме алып келдік өзімізбен бірге биыл. Балалар хореография, театр, би, вокал, робото-техника және спорттық үйірмелерге қатысады. Үйірмелерден кейін өзінің тынығу уақыттары бар. Спорттық ойындары, бассейн бар.
Мамандар бірінші, екінші сыныптағы балалар әдетте үйін, ата-анасын жиі сағынып жатады дейді. Сондықтан оқушыларды лагерьге 3 сынаптан бастап жіберуге кеңес береді.
ДИАНА САПАРҚЫЗЫ тілші:
– Ал Қарағанды облысының 184 мың оқушысы 20 маусымнан бастап жазғы лагерьлерге қабылданады. Сондай-ақ, 10 мыңнан астам балаға қала сыртынан да лагерь ұйымдастырылмақ. Өңірде балалар жылына орай, әлеуметтік жағдайы төмен отбасылардың балаларына да ерекше көңіл бөлініп отыр. Оларға демеушілер «Балаларға жолдама сыйла» челленджі аясында тағы 1300 жолдаманы сыйға тартқан. Ал мектеп жанындағы лагерьлер мен бейіндік алаңға 100 мың оқушы қатысады.
АРУНА МҰҚАШЕВА Қарағанды облысы білім басқармасы тәрбие бөлімінің басшысы
– Қазақстан географиясының киелі жерлері атты жобасы аясында 4200 оқушымызды жаз мезгілінде киелі жерлерге саяхаттауға, Қазақстанның түпкір-түпкірінде орналасқан әдемі орындарды аралауға жолдамақшымыз. Ол әрине ата-аналардың есебінен болады. Бір мектептер демеушілерді тартады.
Облыстағы балалардың жазғы демалысына 350 миллион теңге бөлінді. Ал лагерьге бара алмаған оқушылар, қала ішіндегі мәдени ошақтарға тегін бара алады. Бұл мақсатқа әкімдік 14 миллион теңге бөліп отыр.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#ЖазғыЛагерь #демалыс #балалар

Видео Балаңызды жазғы лагерьге тегін қалай жіберуге болады? канала Информбюро 31