Қазақстандықтар электр қуатымен жүретін көліктерге көшіп жатыр

Дағдарыс демі еселеп, әлемдік экологиялық жағдай нашарлай бастаған тұста жаһан жұрты баламалы энергия көздеріне көшіп, барынша үнемшілдікке бет бұруда. Қазақстандықтар да бұл үрдістен қалыс қалмады.

Жергілікті автосүйгіштер электр қуатымен жүретін көліктерге көшіп жатыр.

Елордалық Санжар Мұстафин Қазақстанда Tesla электрокөлігін алғашқы болып сатып алғандардың бірі. Тұтынушының сөзінше, жанармай бағасы жағадан алып, әлемдік экологиялық ахуал нашарлап тұрған сәтте баламалы энергия көзін тұтынатын әрі қалтаны қағылудан қорғайтын бұл тұлпардың өндіріліп шығарылуы – уақыт талабы.

Санжар Мұстафин, көлік иесі

-Tesla көліктері – автомобиль эвалюциясының бір нышаны. Десе де электр қуатының ғана көмегімен жүретін экологиялық таза көліктің кемшілігі де бар. Ол оның бағасы. Жаңашылдықтар бас кезінде қымбат болары анық. Бірақ бара-бара бұның құны да түседі деген ойдамын. Қазір Еуропа елдерінің басым бөлігі осы көлік түріне көшуде. Болашақ осы техникалық жетістікте.

Жүрегі май мен бензиннен айнитын электрокарға отандық автосүйгіштердің қызығушылығы артып келеді. Бүгінде Қазақстанда tesla көліктерінің 30 данасы бар. Оның үшеуі – Астанада.

Дәстүрлі емес энергия көзіне көшіп үлгерген жүргізушілер көліктің техникалық мүмкіндіктері зор екенін айтады. «Ол электр қуатын стандартты тоқтан 220 вольттен алады, заманауи жабдықтармен қамтылған», – дейді олар.

Жұрағат Баман, тілші

-Бар болғаны 3,5 сағатта қуатталатын бір аккумулятор күшімен 400 шақырымды оңай еңсеруге болады. Экологиялық таза көліктің тағы бір ерекшелігі ол ғаламторға тікелей қосылған. Яғни баратын бағыт-бағдарыңызды белгілесеңіз болғаны, оп-оңай сол жерге апара алады.

Қарапайым бензинді қозғалқышты қалайтын жүргізушілер ғаламторда электрокар батареяларының суық аймақтарда қатып қалып, жүрмейтінін жазған. Ал tesla иелері бұл сыбысты қауесет деп атап, жалған ақпарды жоққа шығарды.

Санжар Мұстафин, көлік иесі

-Өздеріңіз көріп тұрғандай, көлігім қысқы мезгілде де жүріп жүр. Мезгілінде қуаттап отырса, батареялар ұзақ мерзімді қызмет етеді. Ауа райы әсер етпейді. Менің естуімше, жуырда Қазақстанда да элетрокөліктер шығару көзделген. Біздің аймаққа жарамаса, ондай шаралар жасалмас еді.

Tesla көлігінің бағасы қазақстандықтардың басым бөлігі мініп жүрген жол талғамайтын көліктің құнымен тең. Сондықтан қаражатты қисынсыз шашып, оған қоса қоршаған ортаға залал келтіргенше, болашақ энергия көздеріне көшу әлдеқайда тиімдірек болары анық.

Авторлары: Жұрағат Баман, Асхат Қарақойшиев

Видео Қазақстандықтар электр қуатымен жүретін көліктерге көшіп жатыр канала Khabar Novosti