ЭКО-ны қалай тегін жасатуға болады?

Елімізде биылдан бастап ЭКҰ әдісіне бөлінетін квота саны жеті есеге өсті. Тек соңғы жарты жыл ішінде «Аңсаған сәби» жобасы арқылы 2 миллиард теңгеден астам қаржыға 2 300 әйелге жасанды ұрық салынған. Мамандар бұл квоталар тек міндетті әлеуметтік медициналық сақтандыру қоры арқылы қаржыландырылатынын айтады. Ал қорға тіркелмеген немесе жарна төлемейтіндер үшін экстракорпоралдық ұрықтандыру рәсімі ақылы болмақ.
Он бес жыл бойы өздігінен бала көтере алмаған Сәуле Мырзақаева ақыры дәрігерлердің көмегіне жүгініп, ЭКҰ жасатуға шешім қабылдаған. Жасанды ұрық салдыру үшін кезекке 2019-шы жылы тұрыпты. Бірақ, сол кезегі тек биыл тиіп, келіншек жолдасы екеуі жасанды ұрықты квотамен тегін салғызған. Қазір жүктіліктің бесінші айында. Сәуле мұндай жолмен сәби сүюді елден жасырып, ұялатын ештеңесі жоқ деп санайды.
СӘУЛЕ МЫРЗАҚАЕВА:
– ЭКҰ процедурасы жақсы жүргізілді. Бәрі тегін болды. Тұңғышымды он бес жыл бұрын дүниеге әкелдім. Содан кейін екінші баланы көтере алмадым. Бармаған, қаралмаған жеріміз қалған жоқ. Сосын жолдасымыз екеуміз ақылдасып, ЭКҰ-ға тәуекел еттік. Баланың жынысын әзірге білмейміз. Бірақ жолдасым ұл болғанын қалайды.
Дәрігерлер жасанды ұрықтандыру рәсімі міндетті сақтандыру қорына тіркелгендер үшін ақысыз, ал сақтандырылмағандардың ақылы жасатуға тура келетінін айтады. Тек биылдың өзінде елімізде медициналық сақтандыру арқылы 2 мыңнан аса жасанды ұрықтандыру жолы қаржыландырылған. Мамандар «Аңсаған сәби» жобасына да квота осы қордан берілетінін айтады.
МӘМС арқылы ЭКҰ жасатуға Қазақстанның кез-келген яғни 18 бен 42 жас аралығындағы әйелдер өтініш бере алады. Алдымен, пациент қызмет көрсететін медициналық ұйымды таңдайды. Кейін жоғары технологиялық медициналық қызметтер комиссиясының қорытындысын алу үшін тіркелген жері бойынша өзінің учаскелік дәрігеріне жүгінеді. Ал, дәрігер пациентті бедеуліктен зардап шегетін диспансерлік науқастардың электрондық тізіміне енгізеді. Тиісті тексеруден кейін бедеуліктің себептері анықталған жағдайда, учаскелік дәрігер пациенттің құжаттарын МӘМС есебінен жоғары технологиялық медициналық қызметтер жөніндегі комиссияға жібереді. Соңғы қадам пациентті емдеуге жатқызу бюросы порталында жүргізіледі. Қызмет алудың басталу күні мен уақыты хабарланып, барлық дерек медициналық ақпараттық жүйеге енгізеді.
СВЕТЛАНА ЕСЕНАМАНОВА, Ақтөбе облыстық перинаталдық орталығы бас дәрігерінің орынбасары:
– ЭКҰ - ол бірнеше этаптан тұрады. Көрсеткіші бойынша әйел жағынан, ер адам жағынан болады. Соның ішінде гормональді тексеру, бастардың алдында жалпы клиникалық тексеріс бәрін біз список бойынша береміз. Бақылаймыз. Дайындық кезінде дәрі, витаминдер береміз. Емдейміз. Осылай дайындап, ЭКҰ программаға кіргіземіз.
Мамандар міндетті әлеуметтік медициналық сақтандыру қоры арқылы жылына тек бір рет қана ЭКҰ жасатуға болатынын айтады. Ал, талпыныс сәтсіз аяқталса, келер жылға қайтадан кезекке тұрады. Қазір Қазақстанда экстракорпоральді ұрықтандырумен айналысатын 26 орталық бар. Елімізде соңғы 10 жылда дәл осындай жасанды жолмен 22 мыңнан астам сәби дүниеге келген.

Жанар Қожанова, Жомарт Құдайбергенов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#ЭКО #жасанды_ұрық #медициналық_сақтандыру

Видео ЭКО-ны қалай тегін жасатуға болады? канала Информбюро 31