Қазақстан әскери әлеуеті жағынан әлемдік рейтингте 13-ші сатыға адымдады

Айбыны асқақ армиялы елдердің тізімін жыл сайын белгілі Global Firepower порталы түзеді. АҚШ, Ресей, Қытай сынды азулы мемлекеттер әдеттегідей көш бастап тұр.

Ал Қазақстан биыл бірқатар Еуропа және Парсы шығанағындағы елдерді артқа тастап, тізімде 53-ші орынға тұрақтады.

Рейтингті әзірлеу кезінде сарапшылар елдің экономикалық көрсеткіштерінен бастап, географиясы, жауынгерлер саны, әскери техника көлемі, тіпті әуе күштерінің қауқарына дейін тәптіштеп зерттеген.

Тілшіміз Эльвира Тағайқызы осы отандық әскери авиацияның кешегісі мен бүгінгісіне тоқталады.

Тәуелсіздікті тәу еткен – Тоқтар Әубәкіров. Ғарышты бағындырған ұшқыш. Әуе қорғанысын да аяқтан тұрғызғандардың бірі.

Кеңеспен бірге ыдырауға шақ қалып еді. Әскери бөлімшелер қаңырап, мамандар тапшылығы сезілген. Ұшақтар қараусыз, зымырандар мінусіз қалды.

Ангардан ұшақтарды алып, алаңсыз өз еліне ұшып кеткендер болды. Кейбір бөлімшелерде офицерлер қалса, кейбірін солдаттар ғана қарап қалған.

Тоқтар Әубәкіров, ҚР Халық қаһарманы

-Қазіргі уақытта басқа өмір. Біз казармада от жағатынбыз, кәдімгідей от. Тамақ ішу үшін, тамақ дайындау үшін не свет жоқ, не отын болмады. Сондай жағдайлардан өттік. Сол кезде біз намыс арқылы шықтық. Қазақтың намысы болмаса соны көтере алмас едік. Намыс болмағанда сондай күнге, осындай дәрежеге жете алмас едік.

Әскери техникадан бұрын оны тізгіндейтін маманның болмағаны қиындық туғызған. Елдегі қара домалақтарға үйрету уақытты алды. Амал жоқ, алдымен өзге елдің кадрлары шақыртылды. Олар үшін барлық жағдай жасалды.

Тоқтар Әубәкіров, ҚР Халық қаһарманы

-Біздің әскерилерде әлеуметтік жағдай жақсы болды. Сонымен көпұлттық әскери болса да ана ұлттар қашпай осында болатын болды. Үйге анау Ресейге ма, Украинаға ма, басқа жерлерге олар барып келуіне тегін болды. Сол отпуск тегін болды біз арқылы. Соның бәрі бізге керек болып тұрды. Ол кезде өзіміздің ұлттық әскери азаматтарды жинауға тырыстық.

Содан бері 18 жыл ырғып өтті. Қазір Қарулы күшіміздің құбыласы түгел. Әсіресе әуе қорғанысы сап алда тұр.

Аузын айға білегендермен қатармыз. 500-ден аса әскери ұшақ, 400-ге жуық тікұшақ, 100-ге жуық тасымалдайтын әскери техника бар. Зенитті зымыранның түр-түрі, барлауыштардың соңғы үлгісі бізде.

Эльвира Тағайқызы, тілші

-Біз дәл қазір Астанадағы әскери бөлімшелердің бірінде тұрмыз. Мұнда әскери техникалардың біразы бар. Мәселен, әуе кеңістігіндегі замануи тікұшақтардың бірі – Eurocopter. Ол дәл осы маңдағы арнайы зауытта жасалып шығарылған. Зауыт 2011 жылы іске қосылды. Осы уақытқа дейін дәл осындай тікұшақтың 26-сын жасаған. Ал сәл одан әрірек әуе кемелерін жөндейтін арнайы орталық салынды. Бұдан бұрын бір кешенде әскери бөлімше, тікұшақтарды құрастыратын зауыт және оларды жөндейтін орталық болған емес. Бұл да Қазақстан авиациясының жетістігі деуге болады.

Жақында ғана дүркіреп өткен «КАДЕКС-2016» көрмесіндегі жауынгерлік техниканың жарқырағаны біздікі болды.

Замануи, шапшаң, қайратты десіп кетті өзгелер. Ешкімге мойын бұрмай, өзімізге де сұқтандырмауға күшіміз барын білдірдік. Жұрт оған жүз жылдап жетті. Тәуелсіздігіміздің жетістігі бұл.

Авторлары: Эльвира Тағайқызы, Қанат Әбілдин

Видео Қазақстан әскери әлеуеті жағынан әлемдік рейтингте 13-ші сатыға адымдады канала novosti khabar2016