Астанада 100-ден аса адамды алдап, 112 миллион теңгесін алып алған екі әйел азамат ұсталды

Астанада 100-ден аса адамды алдап, 112 миллион теңгесін алып алған екі әйел азамат ұсталды. Қаржы полициясының айтуынша, Әсемгүл Айтбаева және Ләйлә Отт есімді екеудің жұртты алдау тәсілі де қарапайым болған. Алдымен, банктен алған несиесін төлей алмай, қиналып жүрген таныстарының сеніміне кіріп, тағы кредит алуға үгіттеген. Банкке бірге барып, бар ақшасын санап алған әйелдер, бірінші несиеңді жауып берем деген уәде берген. Осындай жолмен екі келіншек тек қана солтүстік өңірдің 100-ден аса тұрғынын тақырға отырғызып кеткені анықталды. Алайда, полицейлер алданғандар тізімі күн сайын көбейіп жатыр дейді...
Полицейлер әр қырынан түсіріп, суретін жан-жаққа таратқан бұл әйелдің аты-жөні Әсемгүл Айтбаева. Өзін жұртқа "Мәдина" немесе "Әсел" деп таныстырған келіншек алаяқтықпен айналысты деген күдікпен қамауға алынды. Полиция мәліметінше, сыбайласы Ләйлә Отт екеуі несиесін төлей алмай жүрген туыстардың сеніміне кіру арқылы, жүздеген адамды тақырға отырғызып қашып кеткен...
МҰРАТ ЖҰМАНБАВ, ҚР Қаржы полициясының ресми өкілі:
Негізінен олар өздерінің таныс адамдарын несиеге алуға көндіріп отырған. Бұл адамдардың несиелері болған. Жаңа неисе алғанда бұрынғы несиелеріңізді жауып береміз деген. Ал жаңа алынған несиелерді банк өзі жауып тастайды деп уәде берген. Шын мәнінде банктер оған бармайды.
Яғни, мойнындағы бір қарызын төлей алмай жүргендер, қос әйелге алданып бір емес, екі банк алдында борышкер болып шыға келген. Жақсылап әзірленген пысықайлар әр адамды мүмкіндігіне қарай 30 мың теңгеден бастап, 3 миллионға дейін несие алуға үгіттепті. Тіпті, кейбіріне қымбат бұйымдарды кредитке алғызған. Осылайша 100-ден аса адамнан алдап алып кеткен ақшасы 112 миллион теңгегеге жетті- дейді қаржы полициясы...
МҰРАТ ЖҰМАНБАЙ, ҚР Қаржы полициясының өкілі:
Әрбір адамды алдаған кезде схемалары әртүрлі болған. Сондықтан әртүрлі банктерден алынған несиелер.
Қазір қос әйелдің үстінен топтасқан түрде алаяқтық әрекеттер жасады деген факті бойынша қылмыстық іс қозғалды. Әсемгүл Айтбаева қамауға алынса, сыбайласы екі баланың анасы болғандықтан үйқамақта. Дегенмен, құзырлы орган бұл әйелдерден зардап шеккендер бұдан да көп болуы мүмкін дейді. Сондықтан, алданғандар қаржы полициясына хабарласуына болады.
Гүлбану Әниятқызы, Нұркен Тоқмурзин.

Видео Астанада 100-ден аса адамды алдап, 112 миллион теңгесін алып алған екі әйел азамат ұсталды канала Информбюро 31