"Захало", Махмудов 1ийсан байт

Бузучу малхаца серло а къевсина,
Урам а къагийна, хьо йог1уш яйча,
Сан дог ахь лецира, доккхуш хьайн дола
Ахь атта даьккхира сан деган дог1а.

Ког байбеш, чехка, хьоьца нисвелла,
Ас хьоьга хаьттира: « мегар дуй йовза?
Цхьанге а ца дийца лачкъийнарг довза?
Ахь ечу ойланийн хелхарехь хьовза?

Б1аьрга чохь дог дешшал со а вац говза,
Чуверза лур вац со, ца йовзахь тховса»
Ахь элира: « ю хьуна ц1ена дог дезна,
Мел боккхучу когаца диканиг лехна

Массо а до1анца Деле ирс даьхна.
Хьо лоьхуш хиндолу б1аьргаш ган хаьгна.
Хьайн сий а лардина са дала кийча
Хьайн амал ца тайнехь хьайн некъ ма леца

Лууш яц хьо дешнаш хилийта эрна».
Ахь х1ора дашца со говза лецира
Хьо гича сецна б1аьрг хьайха а буьзира
Сан ойла, з1ара деш, дозаллех юьйцира,

Хьо сацош ала дош со леха вуьйлира:
«Ден-ненан хьехарех пайда эцна ву хьуна,
Массо йо1 йиша санна лерина ву хьуна,
Со айса хестор, соьгахь и дац хьуна,

Ас хьоьга доьхуш дерг цхьа дош ду хьуна,
Дог маьрша ду алий со ирсе вехьа!
Хьайна вай довзарех ца хилахь эшам
Хилийта вайшинна беккъа цхьа тешам».
Хьан ела яларо ягийра шеко,
Бух боцуш яйира деган т1ера шело.

Иса Махмудов

Видео "Захало", Махмудов 1ийсан байт канала ZMMSCREEN EUROCHECHENS