قصيدة هوس - مارد الشعر - الكنق - محمد بن راشد بن الذيب ( وش تقول ) في يامي يهز الملوك بيام

انا البارحه ماسك على لسان فكري زام
أخاف اللسان يقول شي ما ودي به

سكتنا على شان الذهب والسكوت اتوام
لكنّ الذهب فــــ السوق طاحت مكاسيبه

وصرفنا من الفضه لو انها مــ هي تنسام
ياكثر الحكي و الى بغيناه ناتي به

وشــ تقول في رجّال حزنه على الاحلام
مثل حزن من باروا عياله وهو شيبه

تساوى البراءه في عيونه مع الاجرام
لكنّ الحزن مثل الخَبَل وشـــــ نسوي به

وشتقول في ضلع نبت فيه عرق ثمام
وهبوب الهوى صلفه ولاهي بتومي به

وشــ تقول في ميت قِبَر ساحة الإعدام
على الحي صوت الحي الآخر يعزي به

وشـ تقول في حي تنكس له الأعلام
مقامه في عين اعداه قدّام اصاحيبه

وشـــ تقول في خشم يفرّك وفيه عرام
والأشناب بـــ أكملها تحت روس اشانيبه

وشـ تقول في ثوب طويل وبدون أكمام
يحدّك على الطيحه الى جيت تمشي به

وشـــــ تقول في بنت رزقها العزيز غلام
حداه الهيام .. وغاب .. و اقفت به الغيبه

وشــ تقول في طير شلع كبد ذيب وحام
يعشّي فروخه كبد ذيب بمخاليبه

وشــ تقول في حاكم قهر شعبه المنظام
من الكبر كنّه يعطي الشعب من جيبه

وشـ تقول فــ المأموم به لــ ازعل الإمام
يصلي به الإمام .. أو ما يصلي به

وشــ تقول في طيب الخوال ووفا الأعمام
الى اخطى على الآخر حداهم من يعيبه

وشـــ الغتره المرزام ولا بلا مرزام
او العصبه ام العزّ و الشّال والهيبه

وشــ تقول في ظرف الزمن والظروف أحكام
عبيد في علم الغيب واسياد في الغيبه

وشـ تقول في اللي حج لكن بدون احرام
نضحّي بكبش العيد .. ولا نضحّي به

وشـ تقول في المفطر ضحى والعباد صيام
وهو في قيام الليل ربّه يماري به

وشـــ تقول في بطن مسمنه زاد أيتام
واكل من تمر مكه واكل من تمر طيبه

وشـــ تقول في ناقة نبي الله ام خطام
يعزّر بها في كل مفلى تفلّي به

وشــ تقول فيمن عاش أفقر من الحجّام
وبنوك الفرنجه كل ماجا تهلي به

وشـ تقول في يامي يهزّ الملوك بيام
تغرب مع حرب وتجلوى مع عتيبه

وجودي على جيّة ابراهيم فـــ الدمام
وجود الكريم اللي رخوم معازيبه

وشـــــ تقول في مسلم مايفقه من الإسلام
سوى أن الزواج بــ اربع الدين يوصي به

يحسب الصحابه مثلي ومثل ابا تمّام
ويحفظ الحديث امثال مطلق وابو شيبه

انا في ضميري بيت مهو ببيت هيام
لكنّ السديري يوم غنّى سبقني به

الى خاب ظنك في الرفيق الموالي عام
ورى عام والشعّار مـثلي تـغني بــه

من الحزن ونّه .. كنّها صرخة النهام
الى ضاع رزقه بين نوخذته وسيبه

مراتعه مابين الحنايا بدون خيام
ولا باقي الاّ ضلع واحد وحلّي به

قصيدة هوس .. لقْحَت بها شطحة الإلهام
ياساري مساءك جنّ .. وش انت ساري به

Видео قصيدة هوس - مارد الشعر - الكنق - محمد بن راشد بن الذيب ( وش تقول ) في يامي يهز الملوك بيام канала sky Boy