Доллар құны бүгін тағы шарықтап 505 теңгеге жетті

Доллар құны бүгін тағы шарықтап 505 теңгеге жетті. Соның салдарынан азық-түлік өнімдері, тұрмыстық техниканың бағасы қымбаттап шыға келді. Ал жаз басталмай жатып құрылыс материалдарының құны тіпті 40 пайызға көтерілген. Айналдырған бір апта ішінде теңгенің бұлай құнсыздануы халықтың қалтасына соққы болып жатыр. Базардағы баға тұрақтала ма?
САМАЛ ҚАБЫШЕВА, тілші:
– Алматы облысының орталығы Талдықорғанда азық-түлік, көкөніс, жеміс-жидектің бағасы аспандап тұр. Дүкендерді айтпағанда, қара базарда сиыр етінің келісі 2500 теңге, қой еті 2200 теңгеден сатылуда. Ал жұмыртқаның 10 данасының ең арзаны 460-530 теңгеден басталады. Бұдан бөлек шет елдерден жеткізілетін көкөністердің бағасын былай қойғанда, Қапшағайдан жеткізілетін баялдының келісі бірден 1000 теңгеге қымбаттап, келісіне 2500 саудаланып жатыр. Ал базар қызметкерлері азық-түлік бағасын көтермеуге кепілдік бере алмаймыз дейді.
Қазір базарда қап-қап азық-түлік алып жүрген адам көп. Барлығы баға одан ары аспандамай тұрып, тым болмаса 2-3 айға жететін өнімді әзірге арзан бағамен алмақ ниетте.
ЖАНАР ҚОЖАНОВА, тілші:
– Әдетте жазғы маусымда бағасы аспандап тұратын құрылыс материалдары қазірден бастап қымбаттап жатыр. Базардағы сатып алушылар мен саудагерлер соңғы он күннің ішінде құрылыс пен жөндеу жұмыстарына қажетті материалдардың бірден 30-40 пайызға көтерілгенін растап отыр. Қымбатшылық әсіресе құрғақ қоспаларда. Оның бағасы бірден 40 пайызға өскен. Әр тауардың үстіне бес пайыздан артық қосып сата алмаймыз деген саудагерлер құрылыс материалдарының дені Ресейден келетінін айтады. Сондықтан қазіргі геосаяси жағдай бағаға әсер етпей қоймады. Тіпті ертеңгі сауданың қалай болатынын да білмей отырмыз дейді. Қазірдің өзінде саудасы тоқтаған тауарлар да бар екен.
СВЕТЛАНА ҚАРАЖАНОВА, саудагер:
– 40 пайыздай өсіп қалды. 30-40 пайыз. Қалай ажиотаж кетті содан бері осындай ажиотаж бізде де кетті ценамен. Даже өзіміз де білмейміз ертең қандай баға болатынын. Тауар бола ма, болмай ма оны да білмейміз. Ештеңе де айта алмаймыз.
Саудагерлер әзірге бұрынғы бағамен алып қойған қоймадағы тауарларын сатып жатыр. Ал жазғы маусымда жағдайдың қалай боларын тіпті болжай алмаймыз деп отыр.
МАХАББАТ НҰРЖАНҚЫЗЫ, тілші:
– Сондай-ақ, АҚШ валютасының шарықтауы әсіресе электроника және тұрмыстық техника дүкендеріндегі тауарлардың қатты қымбаттауына әсер еткен. Өйткені, мұндай тауарлардың барлығы импорттық тауар. Техника дүкендер желісі жетекшілерінің айтуынша, қазір сөредегі тауарлардың 80 пайызының бағасы өскен. Оның ішінде, әлемге танымал брендтер көш бастап тұр. Теледидар, тоңазытқыш, смартфонның бағасы құбылып, бір күнде бірнеше рет өзгеріп жатыр. Сондықтан, халық осы және осыған ұқсас техникаларды сатып алып жатыр екен. Дегенмен, мамандар бұрынғыға қарағанда сатып алушылар саны азайды дейді.
#Теңге #девальвация #қымбатшылық #доллар
.
.
.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Доллар құны бүгін тағы шарықтап 505 теңгеге жетті канала Информбюро 31