Шымкенттіктерді «шырылдатып» кеткен қаржы пирамидасының насихаттаушылары әлі бостандықта жүр

Шымкентте "Л-Капитал" қаржы ұйымына ақша салып алдандық дегендер бүгін прокуратура алдына жиналып, құқық қорғаушылардың түсінік берулерін талап етті. Айтуларынша, прокурорлар қозғалған қылмыстық іске қатысты 8 айдан бері ақпарат бермепті.. Есесіне, елді алдап, ақша алып келгендер қазір түк болмағандай бостандықта жүр деп ашынады жұрт.
Прокуратура маңына жиналғандар "Л-Капитал" компаниясының өкілдері үстінен кезекті рет арыз жазып, қол жинап жатыр. Бармаған жеріміз қалмады деген жұртшылық шағымданудан шаршадық дейді. Елдің ашуын тудырғаны, алдап ақшаны қалтасына басқандар жазалану орнына, әлі күнге бостандықта тайраңдап жүргені болыпты.
АҚЖАРҚЫН ЖАМАЛ, тұрғын:
– Бір-екі адамдарды үй қамаққа алған екен. Ал енді қазір прокуратураға келіп отырмыз, өйткені спец прокурорлар істі сотқа өткізбей отыр.
Жұртшылықтың жоғалтқаны қомақты. Кемі 2 миллионнан 20 миллион теңгеге дейін салғандар бар екен. Оның пайызын да қайтарып үлгермедік дейді. Ұлттық Банктен алынған лицензияны көрген соң сеніммен қараған серіктесіміз тақырға отырғызды деп ызалы.
КЛАРА ҚАНЫБЕКОВА, тұрғын:
– Бұл организация әлі күнге дейін ақша жинап жатыр екен. Қазір спец прокуратура айналысып отыр екен тергеуімен. Осы уақытқа дейін осыны осы қалада насихаттаған адамдар әлі күнге дейін іске тартылмай отыр. Не үшін?
Әу баста салымдарыңыз азық-түлік пен құрылыс және логистикаға инвестиция көзі ретінде қолданылады дегендер 300-ге жуық шымкенттікті "шырылдатып" кетті дейді. Қомақты қаржымен қоғамды сандалтқандарға қатысты құқық қорғаушылар іс тергеліп жатыр деп қысқа жауап қайырды.
НҰРЛАН МАХАДИЛОВ, Еңбекші аудандық прокурорының орынбасары:
– Еңбекші АПБ ҚК 271 бабы 3 бөлігі 2 тармағымен "Л-Капитал" ЖШС қарсы қылмыстық іс қозғалған. Қазір 300-ге жуық жәбірленуші анықталған. Олардың әрқайсынан жауаптар алынып, сот сараптамасы тағайындалған. Қалған тергеу іс әрекеті ҚКПК 201 бабына сәйкес, жариялануға жатпайды.
Жиналған жұртшылыққа прокуратура өкілдері жарты айдан соң нақты жауап айтамыз деп қайтарды. Ал қаражатынан қағылған қара халық қомақты қаржымызды қайтармайынша, шағымдана беруден қайтпаймыз деп отыр.
Мақсат Жақсыбайұлы, Абай Қожагелдиев
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#ЛКапитал #қаржылық_пирамида #алаяқтық

Видео Шымкенттіктерді «шырылдатып» кеткен қаржы пирамидасының насихаттаушылары әлі бостандықта жүр канала Информбюро 31