Андижонда одам қандай ёнган эди? Effect.uz марҳум яшаган уйга борди

Effect.uz Андижонда ўзини ёқиб юбориб, сўнг вафот этган йигитнинг уйига борди. Одам қандай ёниб кетган эди?

Жорий йилнинг 21 январь куни андижонлик 30 ёшли фуқаро мажбурий ижро бюроси ходимлари кўз олдида ўз устидан бензин қуйиб ёқиб юборган эди. Орадан саноқли кунлар ўтгача, фуқаро Хушнуд Ғойибназаров 45 фоиз даражадаги куйиш ҳолати билан шифохонанинг жонлантириш бўлимида бу ёруғ оламни тарк этди.
Бош прокуратура матбуот хизмати ушбу ҳолат бўйича расмий баёнот бериб, фуқаронинг вафот этиши ҳолати юзасидан жиноят кодексининг 103-моддаси 1-қисми (“Ўзини ўзи ўлдириш даражасига етказиш”) билан жиноят иши очди.
МИБ матбуот хизмати ҳолатга қуйидагича муносабат билдирди:
МИБ ходимлари, шунингдек, даъвогар ва жавобгар иштирокида далолатнома расмийлаштириш жараёнида тарафлар ўртасида келиб чиққан келишмовчилик сабаб ижро ҳаракатлари бир кун кейин — 22 январь кунига қолдирилади.
Шундан сўнг, МИБ ходимлари ва ижро ҳаракати учун жалб қилинган бошқа шахслар қайд этилган манзилдан чиқиб кетаётган вақтида жавобгар Хушнуд Ғойибназаров ўзига бензин сепиб, ўт қўйиб юборади. Оқибатда танасининг 45 фоизи куйиб, оғир тан жароҳат билан шифохонага тушади.
Шунингдек, МИБ матбуот хизматининг алоҳида таъкидлашича, МИБда суд қарорлари муҳокама этилмайди. Балки қонуний кучга кирган суд ҳужжатлари ижроси таъминланиши шарт. Суд қарорлари ижросини вақтинча тўхтатишнинг қонуний тартиблари бор.
Нима бўлганда ҳам суд қарори ижросини ўз-ўзига ўт қўйиш орқали тўхтатишга уринишни тўғри танлов эмас. Айни пайтда ҳолат бўйича Андижон туман прокуратураси томонидан текшириш ишлари олиб борилмоқда.
Бундан ташқари, ҳолат бўйича мажбурий ижро бюросининг Андижон вилояти бошқармаси оммавий ахборот воситалари, Ахборот хизмати ходимлари ва блогерлар учун матбуот анжуманида айтилишича, фуқаро нима учун ўзини ёқиб юборгани сабаблари ўрганилмоқда экан. Қўшимча қилинишича, оловни ўчириш учун МИБ ходимлари уйнинг ҳовузидан челакда сув олиб чиқиб, ўчиришга кўмаклашган.
Аланга ўчирилганидан сўнг фуқаро Х.Г. бюро ходимларининг ёрдами билан Андижон туман тез тиббий ёрдам кўрсатиш шифохонасига олиб борилган. Бироқ марҳумнинг опаси EFFECT.UZ’га берган интервьюсида МИБ ходимлари олов аланга олган вақтда машинасига ўтириб, қочиб кетганини айтган эди. EFFECT.UZ тайёрлаган видео интервьюда ҳам марҳумнинг қўшнилари МИБ ходимлари ёнаётган инсонга ёрдам ҳеч қандай ёрдам кўрсатмаганларини айтиб ўтди.
МИБ биз оловни ўчирдик деб ўзини оқласа, бир томонда ёниб кетган фуқаронинг яқинлари “Бизнинг ҳеч кимдан қарзимиз, йўқ! Укам ноҳақликка чидолмасдан ўзини ёқиб юборди”, дея нола-фарёд қилмоқда. Киши базида кимга ишонишни ҳам билмай қолар экан…
Шундай қилиб, бир оиланинг забардаст фарзанди бу дунёни эрта тарк этди. Хушнуд энди куч-қувватга тўлиб, ота-онаси, яқинларини, энг асосийси Ватани учун хизмат қилиши керак эди, аммо... У энди орамизда йўқ. Хушнуд Ғойибназаров фақат ўзини ёқмади, у яқинларини ҳам ёндириб кетди.
EFFECT.UZ ахборот агентлиги мухбири Элёр Тожибоев 21 январь куни Андижон тумани, Ёрбоши ҚФЙ, Бешбўйноқ МФЙ Бодомзор кўчаси 140-уйда яшаган Хушнуд Ғойибназаровнинг “ўз жонига қасд қилганлиги” ҳолатини ўрганиб чиқди. Журналист марҳумнинг отаси ва опаси билан ҳолат содир бўлган уйда учрашди.
EFFECT.UZ журналисти фарзандини қора тупроққа қўйган ота, ўз жигарини эрта бериб қўйган оилага таҳририятимиз номидан чуқур ҳамдардлик изҳор этди.
Мажбурий ижро бюросининг вилоят бошқармаси бошлиғининг ўринбосари Камолиддин Зулфиевнинг маълум қилишича, Мажбурий ижро бюросининг Андижон тумани бўлими ходимлари томонидан иш юритувига фуқаролик ишлари бўйича Андижон туманлараро судининг 2019 йил 17 январь кунги жавобгар Х.З.Ғойибназаров ва унинг оила аъзоларини Андижон туман “Бешбўйноқ” МФЙ “Бодомзор” кўчасидаги 140-уйдан мажбурий тартибда кўчириш ҳамда даъвогар Мавлудахон Байхановани ушбу уйга киритиш бўйича ижро ҳужжати келиб тушган. Даъвогар Мавлудахон Байхановани уйга киритиш иши айнан ушбу ижро хатига асосан олиб борилган.
Эътиборингизга ҳавола этилаётган видеода воқеалар ривожи аслида қандай содир бўлгани, Хушнуд Ғойибназаров қандай вафот этгани ва “довюрак” МИБчиларнинг кўрсатган қаҳрамонликлари ҳақида марҳумнинг отаси, опаси ва қўшниларидан эшитасиз.
EFFECT.UZ таҳририяти яна бир бор марҳумнинг оила-аъзоларига қайғули таъзия билдиради.

Батафсил: https://effect.uz/n/3281

Официальный сайт: http://www.effect.uz/
Instagram http://instagram.com/effectuzb
Telegram https://telegram.me/effectuz
Facebook https://www.facebook.com/effect.uz/
Twitter https://twitter.com/Effectuzb
ВКонтакте https://vk.com/effectuz
Одноклассники https://ok.ru/group/55599312601190

Видео Андижонда одам қандай ёнган эди? Effect.uz марҳум яшаган уйга борди канала EFFECTUZ AXBOROT AGENTLIGI