Маңғыстау облысында ашынған жұмысшылар ереуілге шықты

«ӨзенМұнайГаз» акционерлік қоғамына сервистік қызмет көрсететін «Кезби» компаниясының 500-дей жұмысшысы жұмысты тоқтатып ереуілге шықты. Ұңғымаларды жөндеумен айналысатын азаматтар компанияның әлеуметтік жағдай жасамайтынына наразы. Ауыр жұмыс істейтіндер тіпті емделуге де мүмкіндік жоқ деп отыр. Айтуларынша, айлық жалақы өздері қызмет көрсететін «ӨзенМұнайГаз» қызметкерлерінің жалақысымен теңестірілмеген.
Бірнеше жылдан бері талаптары орындалмай келген Жаңаөзендегі «Кезби» компаниясының жұмысшылары бүгін қолдарына плакат алып ереуілге шықты. Айтуларынша, басшылық азаматтардың әлеуметтік жағдайына мүлде назар аудармайды. Жаңаөзендегі жұмысқа Ақтау мен Ақтөбе қалаларынан, Бейнеу ауданынан келіп нәпақасын тауып жүргендерді не жатын орынмен, не аспен қамтамасыз етпейді дейді. Оның үстіне айлық жалақы да мардымсыз, 200 мың теңгеден әрі аспайды деп ашулы. «ӨзенМұнайГаз» компаниясында дәл осындай қызметте істейтіндердің жалақысы 3 есе көп дейді олар.
Мұнай өндіру ісінде қызмет етіп жүрген бұл азаматтар жұмыс істеуге берілген техникалардың сапасы сын көтермейтінін айтады. Десе де, басшылықтың оларға қойған талабы таудай екен. Ауыр жұмыс атқарып жүргендер компания тарапынан әлеуметтік жағдай жасалмағандықтан, емделудің өзі мұң екенін айтады. Ал Жаңаөзен қаласының әкімдігі мәселенің шешілуіне қолдау көрсетуге дайынбыз дейді.
ҒАЛЫМ БАЙЖАНОВ, Жаңаөзен қаласы əкімінің орынбасары:
– Арыз-талаптарын тез арада шешу үшін біздер бақылауымызбен қазір жұмыскер мен жұмыс беруші арасынан арбитраждық комиссия құрылып жатыр. Сол арбитраждық комиссияда барлық арыз-талап заңды белгіленген мерзімде қаралатын болады. Және солардың орындалуы өз бақылауымызда.
Қағазға жазылған арыздан еш нәтиже болмай, әбден ашынған қызметкерлер күрмеулі мәселе толықтай шешілмейінше ереуілді жалғастыра бермек.
Махаббат Нұржанқызы
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#ӨзенМұнайГаз #наразылық #жұмысшылар_ереуілі

Видео Маңғыстау облысында ашынған жұмысшылар ереуілге шықты канала Информбюро 31