PROFİLAKTİKA ÜÇÜN DƏRMAN QƏBULU DOĞRUDURMU?

Dünyanın hər bir yerində həkimlər koronavirus əleyhinə vaksinin tapılması üçün tədqiqatlar aparırlar. Virusdan qorunmağa çalışan insanlar isə müxtəlif türkəçarələr edir, vitamin və dərmanlar qəbul edirlər. Azərbaycanda əhalinin bir qismi koronavirusa yoluxmamaq üçün “Arbidol” və “Ergoferon” preparatlarına üstünlük verir. Sosial şəbəkələrdə də bu dərmanların koronavirusa qarşı effektiv olmasına dair videolar yerləşdirilir. Bəs bu dərmanlar həqiqətən koronavirusdan qoruyurmu? Azərbaycan Tibb Universitetinin Tədris Cərrahiyyə Klinikasının poliklinika müdiri Səadət Aşurova CBC-yə açıqlamasında hər iki dərmanın virus və iltihab əleyhinə olduğunu bildirib.
Həkimlərin fikrincə, bu dərmanlardan xəstəliyin ümumi simptomlarını aradan qaldırmaq məqsədilə istifadə etmək olar. Amma dünya alimlərinin səylərinə baxmayaraq, koronavirus pandemiyasına qarşı hələ ki, effektiv dərman preparatı hazırlanmayıb. Psixoloqlar isə deyir ki, koronavirusa yoluxmaq təhlükəsi hər kəsi təşvişə salıb. İnsanlar müxtəlif üsullarla, eləcə də, dərman qəbul etməklə, bu xəstəlikdən qorunmağa çalışırlar. Lakin lazımsız psixoloji təsir arzuolunmaz nəticə verə bilər.
Həkim-psixiatr deyir ki, koronavirusdan qorunmaq üçün immuniteti gücləndirmək, gigiyena qaydalarına əməl etməklə yanaşı, insanların psixoloji hazırlığı da çox önəmlidir.
Həkimlər virusdan qorunmaq üçün insanları düzgün qidalanmağa, çoxlu maye qəbul etməyə çağırırlar. Yağlı qidaları azaldıb, əsasən, meyvə-tərəvəzə üstünlük verməyi və idmanla məşğul olmağı tövsiyyə edirlər.

Видео PROFİLAKTİKA ÜÇÜN DƏRMAN QƏBULU DOĞRUDURMU? канала CBC TV Xəbərlər