Арқалық апатты үйлерден арылып келеді

Биыл «Өңірлерді дамыту» бағдарламасы шеңберінде қаладағы қауіпті ғимараттарды бұзуға 300 млн теңге бөлінген. Қазіргі сәтте жоспарланған жұмыс еңсерілді. Қуанарлығы, бір кездері көп бөлігі қаңырап қалған бұрынғы Торғай облысының орталығында тұрғын үй мен бизнес нысандарын салуға ынта білдірушілер көбейе бастаған.

Арқалықтағы бос тұрғын үйлерді бұзу 2013 жылы басталды. 117 ғимарат апатты жағдайда болатын. Алғашқы жылы бөлінген 100 млн теңгеге тұтас босап қалған 9-аудандағы 17 ғимарат сүрілді. Ал 2014 жылы мемлекет берген 250 млн теңге толық игеріліп, қала құлау алдында тұрған 40 нысаннан құтылды.

Абылай Мауданов, тілші

-Мен тұрған Арқалықтың 6-шағын ауданына жатады. Кезінде қала бұзыла бастағанда мұндағы үйлердің жартысы сақталып, жартысы қаңырап қалған. Босап қалған үйлер адам өміріне қауіп төндіріп тұратын.

Қазір қатер сейілді. Өкініштісі қара темір қабылданған жылдары металл жинаймын деп жүріп 37 адам мерт болған екен. Биыл бөлінген 300 млн теңгеге 32 ғимаратты жою көзделген.

Мұрат Бейсенов, Арқалық қалалық тұрғын үй коммуналдық шаруашылық бөлімінің жетекшісі

-Қазір біздің жұмыс 7-шағын ауданда жүріп жатыр. Негізінен бұзу жұмыстары аяқталды, енді қалған қоқыстың бәрін жергілікті полигонға апарып, жойып жатырмыз.

Сырылған үйлер түгелдей тазартылып, орнына топырақ төселеді. Мердігер компания: «тапсырылған жұмысты мезгілінен ерте аяқтаймыз»,– деп отыр. Сонда 2016 жылдың еншісіне небәрі 28 апатты нысан қалады. Бір жағынан үйлері бұзылып жатқан қалада тіршілік жанданып, жаңадан ғимарат тұрғызуға ынталылар көбейген. Бүгінде қалалық әкімдікке 327 тұрғын жер алуға өтініш түсіріпті.

Дәуренбек Нұрлыбеков, Арқалық қаласы әкімінің орынбасары

-Шағын бизнесті дамытуға, офис салуға, сауда орындарын салуға көптеген жеке тұлғалардан өтініш түсіп жатыр. Арыздардың 99-ы қанағаттандырылды. Коттедж, төменгі қабатты үй дейді ғой. Сондай бізде көп арыз түсіп жатыр.

Сүрілген ғимараттар мен босаған шағын аудандардың инфрақұрылымы пайдалануға келмейді. Сондықтан жер телімдері қала ішінен қарастырылуда. Арқалықтың сыртындағы бос тұрған өндірістік зоналар жандана бастаған. Атап айтсақ, элеватор құрылысы басталды. Келешекте мал соятын цех іске қосылмақ.

Авторлары: Абылай Мауданов, Сергей Трахтанберг

Видео Арқалық апатты үйлерден арылып келеді канала Хабар NEWS