Билік пен мердігердің құрғақ уәдесіне тойдық деген тұрғындар құрылыс алаңына қонбақшы

Солтүстік Қазақстан облысында баспаналарын ала алмай жүрген тұрғындар құрылыс алаңына жиналды. Бірақ мердігерлерді де, құрылысшыларды да таппады. Ал жиналғандардың алдына келген қала әкімінің орынбасары «тағы бір ай уақыт берсеңіздер, пәтер кілттерін аласыздар» деп тағы да сөз берді. Бұл, бесінші рет берілген уәде. Бірақ мердігердің жауапсыздығы мен жергілікті биліктің құрғақ уәделерінен шаршадық деген тұрғындар бір айдан кейін пәтер кілттері берілмесе, тура құрылыс алаңына көрпе-жастықтарын әкеліп қонбақ.
«Ертеңі бітпейтін, құрғақ уәдемен тойдыратын мердігер мен биліктің өтірігінен әбден шаршадық» деген тұрғындар екі жылдан бері баспаналарын даулап жүр. Сөздерінше, құрылысты бастаған мердігер оны аяғына дейін жеткізе алмай, былтырдан бері жұмыс тоқтап қалған. Қазір жаңа үйдің есік-терезесі қирап, қабырғаларынан сызат кеткен.
192 пәтерлі баспана төрт жыл бұрын «Нұрлы жер» бағдарламасымен салынып, 2019 жылы пайдалануға берілуі тиіс еді. Содан бері, мерзімін бес рет кейінге шегеріп, бізді алдап келді дейді халық.
БАҒИЛА ҚАБДУЛИНА, тұрғын:
– Екі жылдан асты уже, қайдағы бір жыл. Ең соңғы рет мамырда тапсырамыз деген. Мамыр да аяқталды. Үй жоқ. Акимат не дейді? Обещает и все. Міне тағы сайрап тұр.
Мердігер компания басшылығы наразы тұрғындардың алдына шықпақ түгілі, құрылыс алаңында да төбе көрсетпеді. Ал билік бірнеше рет мерзімінен кешіктірген құрылыс компаниясымен келісімшартты бұзғанын, жұмыстарды аяқтау үшін жаңадан конкурс жариялау қажеттігін айтып ақталады.
АСҚАР ХАБИБУЛИН, Петропавл қаласы әкімінің орынбасары:
– «Севимстолькон» серіктестігін сот шешімімен лицензиясынан айырды. Енді оның орнына басқа мердігер жұмысты аяқтайды. Ол үшін бюджетте 156 миллион теңге бар.
РУСЛАН ЖАСҰЛАНҰЛЫ, тілші:
– Әкімдік өкілдері 1 шілдеге дейін тұрғын үйді пайдалануға береміз деп сөз береді. Бірақ жаз басталғанымен құрылыс жұмыстары жүргізілмей жатыр. Есіктерде құлып тұр. Тұрғындар енді бір айдың ішінде пәтер кілттерін бермесе осы жерге келіп қонамыз дейді.
Руслан Жасұланұлы, Қуаныш Әлтенов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#баспанасыз_жұрт #құрғақ_уәде

Видео Билік пен мердігердің құрғақ уәдесіне тойдық деген тұрғындар құрылыс алаңына қонбақшы канала Информбюро 31