Salyan şəhərinin Babazanlı yaşayış massivində 60 yerlik uşaq bağçası inşası başa çatıb

Salyan şəhərinin Babazanlı yaşayış massivində Heydər Əliyev Fondunun təşəbbüsü ilə tikilən 60 yerlik uşaq bağçası-körpələr evinin inşası başa çatıb.

3 saylı bağçanın 1 əsrə yaxın yaşı olan köhnə binası ciddi qəzalı vəziyyətə düşmüşdü. Belə ki, taxtadan olan bağça binasının istilik sistemi bərbad, qapı-pəncərələri köhnə idi. Yağışlı aylarda bağçanın tavanından otaqlara su damırdı. Bu səbəbdən yaşayış massivində yeni bağça binasının tikintisinə zərurət yaranmışdı. Artıq belə çətin günlər geridə qalıb. Uşaq bağçasının köhnə binası tamamilə sökülərək yerində yenisi inşa edilib.

İnşa olunan bağça 16 əsas və yardımçı otaqdan ibarətdir. Artıq binanın dam örtüyü vurulub, yeni qapı və pəncərələr quraşdırılıb, elektrik, su kanalizasiya xətləri çəkilib, divarlar rənglənib, kafel-metlax işləri görülüb. Məktəbəqədər müəssisədə yataq, oyun, tədris, tibb, mətbəx və digər yardımçı otaqlar var. Hazırda həyətdə abadlıq işləri aparılır, yaşıllıq salınır. Ərazidə uşaqların əylənmələri üçün oyun meydançaları və müxtəlif qurğular tikilir. Növbəti mərhələdə otaqlarda yeni inventar və texniki vasitələrin quraşdırılması olacaq. Həmçinin bağçada su anbarı tikilib, davamlı enerji təminatı üçün transformator yarımstansiyası və istilik sistemi quraşdırılıb. Valideynlər və sakinlər görülən bu işlərdən olduqca razıdırlar.

Qeyd edək ki, bağçada 60 uşaq təlim-tərbiyə alır. Onların tərbiyəsi ilə 12 nəfər məşğul olur. Bina təmir olunduğundan bağça müvəqqəti olaraq 6 saylı məktəbdə məskunlaşıb.

Видео Salyan şəhərinin Babazanlı yaşayış massivində 60 yerlik uşaq bağçası inşası başa çatıb канала Xeberlertv. az