«Билік бізді тастап кетті». Қатерлі ісікке шалдыққан науқастар дертпен күресуге қауқарсыз

Қызылорда облысында қатерлі ісікке шалдыққан жандар өмірлері үшін алаңдаулы. Өйткені денсаулық сақтау министрлігінің бұйрығымен дәл осы дертті емдеу шараларының науқасқа ең керекті, әрі ең қымбатқа түсетін курстарын кепілді медициналық көмек санатынан алып тастаған. Яғни таргетті және иммундық терапияны енді министрлік қаржыландырмайды. Ең сорақысы, бұл емді қабылдау үшін бір науқасқа жылына кем дегенде 51 миллион теңге кетеді екен.
68 жастағы Рүстембек Шембеков 7 жылдан бері аты жаман аурумен алысып келеді. Ол бүйректің қатерлі ісігіне шалдыққан. Соңғы екі жылдан бері өзіне таргетті ем-шарасы жүргізіліп келе жатқанын айтады. Енді бұл емдеу курсына ақшаны әр науқас өз қалтасынан жұмсайды деген хабарды естігенде, үстіне жай түскендай болыпты.
РҮСТЕМБЕК ШЕМБЕКОВ, науқас:
– Өзім де түсінемін. Өте қымбат дәрілер. Маған айына осы екі препаратқа 4,5 миллион теңге кетеді. Мен енді өзім зейнеткер болсам, бұл ақшаны таба алмаймын ғой. Алсам бір ай алуым мүмкін.
Бұйрық бойынша былтыр қазан айынан бастап таргетті терапияны тек сүт бездері ісігі мен жатыр ісігіне шалдыққандар ғана медициналық сақтандыру қоры есебінен қабылдайды. Басқа түрлерімен ауыратындар өз қаражаттарымен емделуі керек. Ал терапияның бұл түрі қатерлі ісіктің асқынып кетпеуі үшін дәрілік препараттармен жүргізіледі. Алайда оған қажетті дәрінің бағасы жаға ұстатарлықтай. Мәселен ем-шарасының бір курсына науқас кем дегенде 3 миллион теңге жұмсайды. Бір жылда науқас 17 курс ем қабылдауы тиіс.
ЛЮБОВЬ ГЕОРГИЕВНА, науқас:
– Мемлекет бізді керек қылмай отыр. Одан да бір жерге апарып лақтырып тастай салсын бізді. Мынау деген сұмдық қой! Мүмкін емес ақша ғой бұл. Естеріңізде болсын, қатерлі ісіктен ешкім де сақтандырылмаған.
Алайда онкологиялық орталықтың дәрігерлері бұған дейін қолда бар дәрілер арқылы науқастарға тиісті ем-домды жүргізіп келдік дейді. Бірақ қордағы препараттар қазір таусылған екен.
ДИМИТРИЙ ХЕГАЙ, Қызылорда облыстық онкологиялық орталық бас дәрігерінің орынбасары:
– Таргетті және иммунды терапиялар аурулары асқынып кеткен науқастарға жасалады. Бұл ем түрі бекітілген хаттамада бар. Әрине мұндай қаражат қарапайым адамға қол жетімсіз. Бірақ министрлікте осы мәселе бойынша арнайы топ құрылып жұмыс атқарылып жатыр.
Бас дәрігердің орынбасары министрлік жақын арада бұл мәселенің оң шешімін табады деп сендірді. Қазіргі кезде облыс бойынша 60 науқас иммунды және таргетті ем-шараларына тәуелді.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#қатерлі_ісік #науқастардың_зары

Видео «Билік бізді тастап кетті». Қатерлі ісікке шалдыққан науқастар дертпен күресуге қауқарсыз канала Информбюро 31