«Өлімге біреу итермелеген». Семейлік офицердің жұмбақ өлімі

Қазақстанның қорғаныс саласына реформа қажет секілді. Олай дейтініміз, соңғы кездері отан алдындағы борышын өтеуден қашқан сарбаз, өз-өзіне қол жұмсаған сардар, әскерге аман кетіп, ауру болып оралған солдаттар көбейіп барады. Күні кеше Гвардейск әскери горнизонында өзін-өзі кеудесінен атты деген семейлік офицердің өлімі қоғамда қызу талқыға түсті. Алғашында Қорғаныс министрлігі бұл қайғылы оқиғаны жасырып қалуға тырысқан. Жауапты ведомство мұны марқұмның туыстарының қарсылығымен түсіндірді. Алайда бақилық болған әскери қызметкердің жақындары ресми мәліметпен мүлде келіспейтіндерін айтады. Олар Жандос Омаровтың мұндай қадамға өздігінен баруы мүмкін емес, оны әлдекімдер өлімге итермеледі деп есептейді.
Бауыр еті баласынан айырылып, қайғыдан қан жұтқан Анаргүл Демеубаева ұлым өзін-өзі атқан жоқ дейді. Айтуынша, министрлік таратқан ақпараттың бәрі жалған. Яғни, соңғы хатында «қарыз алғаны, денсаулығының нашарлығы» туралы жазылған мәліметтің ешбіріне сенбейді. Керісінше баласы Гвардейск горнизонында қысым көрген болуы мүмкін деп санайды.
АНАРГҮЛ ДЕМЕУБАЕВА, марқұм Жандос Омаровтың анасы:
– Біреу атқан оны, ол өзі атылған жоқ. Өзі атылмайды ол. Өзін-өзі ол өйтіп істей алмайды. Өйтіп істеуі мүмкін емес. Жұмысым жақсы мама деді. Мен бүгін демалыс, демалып жатырмын деді. Даже кешкі дежурствоға баратынын да айтқан жоқ. Жайда айтатын.
Марқұмның анасы қаралы хабарды естігенде Гвардейскке бармақшы болдық дейді. Ал әскерилер «келудің қажеті жоқ» деп қысқа қайырыпты. Сондай-ақ, өзін-өзі атты деген Жандостың соңғы хатын алып баратындарын айтқан. Бірақ хатты сол күйі көрмепті. Мәйітті жеткізген әріптестері де Жандостың жерлеу рәсіміне қатыспай, кетіп қалды дейді марқұмның ағасы. Әрі әлеуметтік желіде тараған хаттың мәтіні де шындыққа жанаспайды дейді.
ЕЛДОС ОМАРОВ, марқұм Жандос Омаровтың ағасы:
– Соны өтірік жазып отыр. Менің ұмытшақтығым бар дейді. Оның ұмытшақтығы жоқ. Ол ақшадан қарыз да болған жоқ. Мынау еще военныйларға айтып жатыр дейді. Олимпта 8 миллион қарызы болған деп. Оның ешқандай 8 миллион қарызы жоқ. Біз тексердік оның бәрін.
Қаралы отбасы құпия жағдайда қаза тапқан Жандосты жер қойнына тапсырып, құран бағыштады. Олар бауырларының өліміне қатысты бар шындық айтылып, әділдік орнағанын қалайды. Ал Қорғаныс министрлігі 22 қараша күні әскери бөлім офицері өзіне қол салғаны және өлер алдында хат жазып қалдырғаны туралы хабарланды. Ресми мәлімет бойынша «марқұмның туыстарының өтінішіне қарай өзге ақпарат жарияланбайды» делінген еді.
Нұрболат Жаңабекұлы, Дәулетбай Нұрмахан
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#офицер_өлімі #Семей #суицид #әлімжеттік #әскер #ҚарулыКүштер

Видео «Өлімге біреу итермелеген». Семейлік офицердің жұмбақ өлімі канала Информбюро 31