Жәрдемге мұқтаж жандардың жанайқайы

Алматы облысы, Еңбекшіқазақ ауданына қарасты Балтабай ауылының мешітін жалғызбасты әйел адам паналап жүр. Өйткені, осыдан он күн бұрын Гаухар Үмбетәлиеваның үйі өртеніп кеткен. Үй дегенде үй де емес, темір дүңгіршегі өртке оранған баспанасында тек құран кітабы ғана жанбай қалған. Алматыда тұратын бес балалы ана да қайырымды жандардың көмегіне мұқтаж. Жалғызбасты ана шиеттей балаларымен жалдап тұратын пәтерін жағалап келе беретін бұрынғы күйеуінен құтылғысы келеді.
«Мынау - кішкене тоңазтқышым еді, ал мынау төсегім, анау жатқан ыдыс-аяғым» деп өртенген баспанасының қасындағы үйіндіні өзі сүйенген таяғымен түрте көрсетіп жүрген кісі Гаухар Үмбетәлиева. Он күн бұрын үйі өртеніп кеткен. Дұрысы, бұл жерде өзі үй жасап алған темір дүңгіршегі болған. Бұрынғы су құбырына тиесілі алаңда орналасқан темір дүңгіршекті паналап келе жатқанына он жыл болған екен. Енді осы ілдебайлап жүрген үйі - қара күйеге айналғалы мешітті паналап жүр.
ГАУХАР ҮМБЕТӘЛИЕВА, Балтабай ауылының тұрғыны:
– Өртенбеген құраным, сумканың сырты жанып, ортасында туу туралы куәлігім қалыпты, басқа ештеңе қалмады.
Ауылдың поштасында газет таратушы болып жұмыс істейтін жалғызілікті кісінің азды-көп жинаған қаражаты да күлге айналған. Өрт өзі үйде болмаған кезінде шығып, түгі қалмаған дүңгіршегін көрген кезінде құлап, балдаққа сүйеніп қалған. Әкімдік, ұзақ жылдар күткен телімін қазір берсе дейді.
ГАУХАР ҮМБЕТӘЛИЕВА, Балтабай ауылының тұрғыны:
– Есімнен танып қалыппын. Мына кісілер скор шақырдық, келмеді, мына кісілер алып барды. Қалай саласың, қайтіп саласың, елдің көмегі, беріп жатқан тиын-тебені бар ғой, екі этаж музей тұрғызам демеймін, осындай шағын времянка болса да тұрғызам.
ЖҰМАН МЫҚТЫБАЕВ, Балтабай ауылдық округінің әкімі:
– Үйіне де барып көргенбіз. Вагонға тұруға болмайды деп. Акт составлять еттік. Ақысыз, жер үй де тауып бергенбіз, ол жерде тұрмаймын деп отыр.
Алматыда пәтер жалдап тұратын Салтанат Нұрмамбетова да қайырымды жандардың көмегіне мұқтаж. Үлкені он, кішісі небәрі бір жарым жасар бес баласымен қалған келіншек баспаналы болғысы келеді. Күніне екі уақыт кішісін үлкеніне қаратып, бес баласын сыртынан қамап, еден жууға кететін жалғызбасты ана, өзім жоқта - бұрынғы күйеуім балалардың мазасын алады деп алаңдайды.
САЛТАНАТ НҰРМАМБЕТОВА, Жалғызбасты ана:
– Басқа отбасына бола, басқа әйелге бола тастап кетті. Ішімдікке салынып кетті десе де болады. Бес баламен пәтер жағалап жүрген жайымыз бар. Мазаны алып қоймағаннан кейін сотқа жүгіндім. Сот болды.
Балалары үшін алатын жәрдемақыдан жырып, 40 мың теңге пәтер құнын төлейтін көп балалы ана, бұдан бұрын да қайырымды жандардан көмек сұрағанын айтады. Алайда, күйеуімнің туыстары қарсы болып, қайырымдылық шарасын тоқтатып тастаған дейді.
Ирина Советжанқызы, Ринат Абулхаиров
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Жәрдемге мұқтаж жандардың жанайқайы канала Информбюро 31