«Казцинк» компаниясы кішкентай бүлдіршіндер үшін биыл да жаңа жыл акциясын қолға алды

Балаларға қамқорлық жасауға қазіргі қауіпті індет пен карантин де кедергі бола алмайды. Казцинк компаниясы шектеу шараларын ескере отырып, кішкентай бүлдіршіндер үшін жылда өткізетін жаңа жыл акциясын биыл да қолға алды.
Бұл азаматтар Өскемендегі ана мен бала орталығына бүгін таңертемен жиналды. Олар Казцинк компаниясының қызметкерлері, спортшылар мен журналистер және блогерлер. Ауруханаға арнайы келген жандар жаңа жылды дәл осы ауруханада қарсы алуға мәжбүр болған сырқат балаларды құттықтауға жиналған. Мерекелік іс-шараны Казцинк компаниясы мен "Торпедо" хоккей клубы ұйымдастырған.
ЕВГЕНИЙ ФОМИНЫХ, "Казцинк" ЖШС қоғаммен байланыс жөніндегі басқарманың басшысы:
– Торпедоның желтоқсан айындағы соңғы ойынында көрермендер ойыншықтар әкеледі. Одан кейін біз оған "Казцинк" компаниясының атынан тәттілерді қосып, желтоқсан айының соңында Торпедо командасымен бірге "Ана мен бала орталығындағы" балаларға таратып беретінбіз.
Бұл ойыншықтарды жылдағыдай мұз айдынында жинауға биыл мұрсат болмады. Өйткені ойынның бәрі жабық түрде өтіп жатыр. Сондықтан Казцинк компаниясы әлеуметтік желілерде акция жариялап, төрт жүзге жуық ойыншық жинаған. Оны блогерлер мен қала тұрғындары қолдаған.
АЛЕКСАНДРА ОСИПОВА, Блогер:
– Мені қолдаған барлық адамдарға рахмет айтқым келеді. Олар ойыншық әкеліп берген және осы акция жайлы ақпаратымды таратқан жандар.
Ал кішкентай емделушілер тек қана сыйлық алып қоймай, оны елге танымал "Торпедо" командасының ойыншылары табыстағанына қуанды.
ӘДІЛ БЕКЕТАЕВ, "Торпедо" хоккей клубының ойыншысы:
– Торпедо хоккей клубының ойыншыларының атынан бүлдіршіндерді келе жатқан жаңа жылдарымен құттықтаймын! Тез сауығып, алдағы уақытта ауырмауларын тілеймін!
Ойыншылар бұл балаларға таратылған сыйлықтың артылған жүз данасын Аягөз қаласындағы әлеуметтік-медициналық орталыққа жөнелтеді.
Жанболат Санияз

Видео «Казцинк» компаниясы кішкентай бүлдіршіндер үшін биыл да жаңа жыл акциясын қолға алды канала Информбюро 31