Оқуға бір ай қалды: оқушылар қандай форматта оқиды? Мектеп формасын сатып алу керек пе?

Жаңа оқу жылының басталуына небәрі бір ай уақыт қалса да, оқушылардың қандай форматта оқитыны белгісіз. Білім министрлігі шешімді еліміздің бас санитар-дәрігері қабылдайды деп отыр. Ал оқушыларға мектеп формасын тігумен айналысатын кәсіпорындар 5 мың ісмерді жұмыстан босатуға мәжбүр болыпты.
Былтыр білім министрлігі оқушылар дәстүрлі түрде мектепке барады деген соң, жаппай форма тігумен айналысқан бұл фабрика,түбі миллиардтаған шығынға батқан. Биыл мұндай тәуекелге бара алмаймыз деген кәсіпорын басшысы, бұдан-былай мектеп формасын тігуді доғаратын шығармыз деп отыр.
АНВАР ХИЛАЖАЕВ, фабрика директоры:
– Былтыр ұжымды сақтап қалу үшін 4 ай мектеп формасын үздіксіз тігумен айналыстық. Бірақ, бәрібір 50 пайыз жұмысшыны қысқарттық. Нарықтағы тауардың 95 пайызы контрабанда.
Пандемия басталғалы бері Қазақстанда мектеп формасын тігумен айналысатын 50 фабрика 9 миллиард теңге шығынға батып, 5 мың жұмысшыны қысқартуға мәжбүр болған. Қазір көбі өзге де киім-кешек түрлерін пішіп-тігумен айналысып кеткен. Форма қажет бола қалса, қоймада 500 мың комплекті бар екен. Биыл тауар бағасы қымбаттай қоймас, бірақ келесі жылы 20 пайызға өсетінін сала мамандары қазірден ескертеді. Өйткені, әлем нарығында матаның бағасы 30 пайызға өсіпті.
ЛЮБОВЬ ХУДОВА, ҚР жеңіл өнеркәсіп кәсіпорындары қауымдастығының президенті:
– Жеңіл өнеркәсіпті пандемия кезінде зардап шеккен салалардың қатарына қосу керек деп былтырдан бері Ұлттық экономика, Индустрия министрлігі, тіпті Сенатқа дейін жеткізіп келеміз. Бұл тізімге кеңес беретін орталықтар да ілігіпті. Біз ресейдегідей барлық салық түрін алып тастасын демейміз, тым құрығанда кейінге шегеруді сұраймыз. Ал Білім министрлігі мектеп формасы қажет пе деген сұраққа уақыт таяса да, жауап бере алмайды.
Шынында да, Білім министрлігі бір айдан кейін оқушылардың нақты қандай форматта оқитынын кесіп айта алмаймыз дейді. Бұл сұраққа бас санитар-дәрігер ғана қаулы шығарып жауап береді деп отыр. Бір анығы, оқушылар дәстүрлі форматқа оралатын болса, маскасыз мектепте ешкім жүрмейді деп отыр.
МӨЛДІР АБДУАЛИЕВА, Білім және ғылым министрлігінің баспасөз хатшысы:
– Әр сынып басқа кабинетке ауыспай, өз кабинетінде оқиды. Оқушылар да, мұғалімдер сияқты бетперде киеді. Үзілістер әртүрлі уақытта болады. Қажет болған жағдайда қосымша ауысымдар енгізіледі.
Биыл да оқушылар білімін мектеп формасын кимей жалғастыратын болса, онда жеңіл өнеркәсіптің 2 пайызын құрайтын тігіншіліктің бұл секторы нарықтан мүлдем кетуі мүмкін. Онсыз да осы уақытқа дейін республика бойынша білім алатын 3 жарым миллион оқушының 10 пайызы ғана отандық мектеп формасын киіп келіпті.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#ОқуЖылы #мектеп_формасы #дәстүрлі_формат

Видео Оқуға бір ай қалды: оқушылар қандай форматта оқиды? Мектеп формасын сатып алу керек пе? канала Информбюро 31