Қазақстан Президенті Нұрсұлтан Назарбаев АҚШ Президенті Дональд Трамппен кездесті

Елбасының АҚШ-қа ресми сапары аясында құны 7 млрд доллар құрайтын 20 келісім бекіді. Еліміз Америкадан Boeing ұшақтарын алып, Қазақстанда 900 электровоз құрастыратын болады.

Сондай-ақ авиация және ғарыштық зерттеулер саласы мен өнеркәсіптік цифрландыру, фармацевтика, аграрлық салада да бірлесе жұмыс атқарамыз. Бұдан бөлек 3 үкіметаралық келісім орнады. Құжатта Қазақстан арқылы коммерциялық теміржол транзитімен қамтамасыз ету, Халықаралық салық кодексін жақсарту мәселелері қарастырылған.

Биылдыққа Елбасының жолы түскен алғашқы ел АҚШ болды. Ақ үй қожайыны да жыл басындағы бірінші мейманын қабылдағалы отыр. Бірақ сапардың өзегі бұл емес. Трамптың әр қадамынан жаңалық күтетін журналистер мен сарапшылар бұл кездесуге көз тігіп, құлақ түруде. Өйткені Ақ үй екінің бірін төріне шығара бермейді. Әрі Орталық Азия елдері ішінде Дональд Трамп өз резиденциясына ресми сапармен шақырған алғашқы президент – қазақ көшбасшысы болды.

Бұл күндері Вашингтонда ауа температурасы күрт төмендеп кеткен. Синоптиктер 1905 жылдан бері мұндай қыс болған емес деп жатыр. Алайда сыртқы ауа райына қарамастан Ақ үйде ыстық ықыластың лебі есіп тұр. Қазақ басшысы бүгін мұнда қадірлі қонақ.

Көпке ұқсамайтын саяси стилі қалыптасқан Трамп мұндай құрметті көрінгенге көрсете бермейді. Содан болар бұл кездесуге назар ерекше. Қазақстан мен Құрама Штаттар арасындағы қарым-қатынас кеше орнаған жоқ. Еліміздің тәуелсіздігін алғашқылардың бірі болып мойындаған Америкаға Президент 1992 жылы барып, алпауытқа серіктестік ұсынған еді. Осы ширек ғасырда арада дорба емес, жорға жүретін деңгейге жетті. Бұл жолғы сапар да серіктестікті жаңа деңгейге көтерері сөзсіз. Кездесудің ресми бөлімі басталмас бұрын Нұрсұлтан Назарбаев Ақ үйдегі «құрметті қонақтар» кітабына қолтаңбасын қалдырды.

Видео Қазақстан Президенті Нұрсұлтан Назарбаев АҚШ Президенті Дональд Трамппен кездесті канала Хабар NEWS