«Кемінде 500 мың керек». Қазақстанның Анталиясы - Ақтауда демалу неге тым қымбат?

Қазақстанның Анталиясы саналатын Ақтауда демалу тым қымбат. Теңіз жағасында тыныққыңыз келсе қалтаңызда кемінде 500 мың теңге болуы керек. Жұрттың көбі демалысқа шығатын жаз мезгілінде ондағы қонақүйлер мен демалыс аймақтары бағаны тіпті аспандап жібереді. Мәселен, қазір қаладағы танымал «Риксос» қонақүйінде екі адамның үш күндік демалысы бақандай 455 мың теңге тұрады. Ал, бес жұлдызды қонақүй былай тұрсын таяуда ғана ашылған "тематикалық паркке" кіру үшін 11 мың теңге төлеуіңіз керек. Мұндай бағадан шошынған туристер, Ақтаудан гөрі шетелде демалған арзан дейді.
Ақтауға барып-қайту үшін бір адамға ұшақ билетінің құны еліміздің астанасынан 85 мың теңге, Алматыдан 75 мың, ал үшінші мегаполис Шымкенттен 50 мың теңге тұрады. Бұл баға билетті алдын-ала сатып алған жағдайда ғана. Ал, тақалғанда әуе компаниялары билет құнын тағы көтеретіні бар. Қаладан 20 шақырымда орналасқан 5 жұлдызды "Риксос" қонақ үйінде екі адамға үш күндік демалыс 455 000 теңгеге айналады. Ал жуықта ғана үкімет басшысы лентасын қиған «Tetys Blu» тематикалық паркіне кіру үшін ересектер 11 мың теңге, балалар 9 мың теңге төлеуі керек. Ол ақшаға тек аттракциондар мен бассейн қызметі кіреді. Ал, ас-су ішкіңіз келсе қосымша шығындаласыз. Өйткені, паркке сырттан бір жұтым су да кіргізуге тыйым салынған. Тұрғындар мұндағы демалысты кез-келгеннің қалтасы көтермейтінін айтады. Мәселен, жарты литрге де жетпейтін тәтті шырынның бағасы - 1100 теңге тұрады. Ал бургер жеймін десеңіз тағы 4500 теңгеңізді қиясыз.
Ақтауда орналасқан қонақүйлерде 20 мың теңгеден бастап, 60 мың теңгеге дейін бір күн демалуға болады. Алайда туристер мен жергілікті тұрғындар үшін мұндай қонақүйлерге тұрақтау тиімсіз. Өйткені, көбінде Каспийге шомылу үшін арнайы аймағы жоқ. Ал облыстық туризм басқармасы демалыс орындарындарындағы бағаны төмендетуге қауқарсыз. Бұл мәселемен монополияға қарсы департамент айналысады дейді әкімдіктегілер. Десе де, жергілікті халқының өзі барып демала алмайтын орындар шетелге танылып үлгергенін мақтанышпен айтып отыр.
НҰРӘДІЛ ИМАНҒАЛИЕВ, Инвестиция және туризм басқармасы басшысының орынбасары:
– "Риксос" қонақүйі ашылған соң Маңғыстау облысының жақсы имиджі қалыптасты. Былтыр өңірге 160 мың турист келді. Ал осы жылдың алғашқы үш айында 52 мыңнан астам қонақ келді, оның 40 мыңға жуығы «Риксос» қонақүйінде демалушылар.
Ал біздің туристер қазір Ақтаудан гөрі шетелде демалған арзанырақ дейді. Салыстырсақ, Алматыдан Египетке бір адам 8 күнге 291 000 теңгеге, Түркияға 8 күнге 253 000 теңгеге саяхаттай алады. Ал Дубайға 4 күнге 170 000 теңгеге қыдырып қайтуға да болады. Бұл бағаның ішіне ұшақтың барып-келу билеті мен қонақүйде тұру, тамақтану мен ПТР талдамасы түгел кіреді.
Махаббат Нұржанқызы, Сәбит Амангелдұлі
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#Rixos_Ақтау #демалыс #туризм #қымбатшылық

Видео «Кемінде 500 мың керек». Қазақстанның Анталиясы - Ақтауда демалу неге тым қымбат? канала Информбюро 31