2020-му на адыходную!

2020-му на адыходную. А там дзве дзюркі ў носе і сканчалося!

Каханенькія-родненькія!
Не думалі, што такое давядзецца казаць нам, але гэта быў цяжкі год. 2020, ты паказаў усім і дзе камар козы пасе і дзе горкі перац расце. Гэта былі сапраўдныя – тудэма-сюдэма – эмацыйныя горкі.

Сёлета мы мусілі адзначаць наша стагоддзе – урачыста, узнёсла, з шампанскім і танцамі да світанку. Аднак атрымалася так, што мы страцілі дом і вельмі хутка зразумелі, што дом – гэта калі мы разам. І мы бачым, што тое самае адчуваюць цяпер многія.

Беларусы, іншага дома ў нас няма. Толькі разам і толькі наперад! Будзьма ж адно для аднаго клопатам і надзейным плячом.

Асабліва ў той час, калі многія нашыя блізкія адзначаюць святы за кратамі, у больніцах ці ў выгнанні. Трымайцеся, каханенькія-родненькія!

Дзякуем вам ад усяго сэрца за вашу падтрымку і любоў – яны зіхацяць наўкола ярчэй за любыя зоркі і феерверкі. Спадзяемся таксама, што феерверкі ўсё яшчэ не ўключаныя ў жыроўкі. Віншуем, абдымаем, жадаем здароўя, гармоніі, дабрыні і здзяйснення мар. А мары ў нас гэтым разам дужа падобныя.

Будзьма разам! Будзьма свабодныя! З новым годам!

Вашы Купалаўцы.

Видео 2020-му на адыходную! канала Купалаўцы