ឧត្តមសេនីយ៍ទោ សោម ស៊ុន និងភរិយា សំណេះសំណាលសាកសួរសុខទុក្ខ ឧបត្ថម្ភអំណោយមនុស្សធម៌, 477-130725

ឧត្តមសេនីយ៍ទោ សោម ស៊ុន និងភរិយា សំណេះសំណាលសាកសួរសុខទុក្ខ ឧបត្ថម្ភអំណោយមនុស្សធម៌របស់សម្ដេចមហាបវរអធិបតី ហ៊ុន ម៉ាណែត និងលោកជំទាវ ជូនអតីតយុទ្ធជន នៅលើដីសម្បទានសង្គមកិច្ច នៅឃុំក្រយា

(ខេត្តកំពង់ធំ)៖ នៅព្រឹកថ្ងៃទី១៣ ខែកក្កដា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង ប្រធានសមាគមអតីតយុទ្ធជនកម្ពុជា ខេត្តកំពង់ធំ និងភរិយា បានដឹកនាំសហការី ទៅសំណេះសំណាលសាកសួរសុខទុក្ខ និងឧបត្ថម្ភស្បៀងអាហារគ្រឿងឧបភោគបរិភោគ ដែលជាអំណោយមនុស្សធម៌របស់សម្ដេចមហាបវរអធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ជូនអតីតយុទ្ធជនដែលមានជីវភាពលំបាកខ្វះខាតចំនួន ១០គ្រួសារ ដែលកំពុងរស់នៅលើផ្ទះថ្មី ដីសម្បទានសង្គមកិច្ច អំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងសម្ដេចគតិព្រឹទ្ធបណ្ឌិត ប៊ុន រ៉ានីហ៊ុនសែន ស្ថិតនៅឃុំក្រយា ស្រុកសន្ទុក ខេត្តកំពង់ធំ។

ឧត្តមសេនីយ៍ទោ សោម ស៊ុន បានពាំនាំនូវការផ្ដាំផ្ញើសាកសួរសុខទុក្ខ ពីសំណាក់សម្ដេចតេជោ ប្រធានសមាគមបតីតយុទ្ធជន និងសម្ដេចគតិព្រឹទ្ធបណ្ឌិត ព្រមទាំងសម្ដេចមហាបវរអធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលជានិច្ចកាល សម្ដេចនិងលោកជំទាវ តែងតែយកចិត្តទុកដាក់គិតគូរគ្រប់បែបយ៉ាងដល់ជីវភាពរស់នៅរបស់បងប្អូនអតីតយុទ្ធជន។ ព្រោះបងប្អូនអតីតយុទ្ធជនរបស់យើង គឺជាអ្នកដែលធ្លាប់បានលះបង់សាច់ស្រស់ឈាមស្រស់ រួមចំណែកជាមួយសម្ដេចតេជោ ដើម្បីបុព្វហេតុសន្តិភាព និងការអភិវឌ្ឍ។

ឧត្តមសេនីយ៍ទោ សោម ស៊ុន បានណែនាំដល់ក្រុមគ្រួសារតីតយុទ្ធជនទាំងអស់ ត្រូវយកចិត្តទុកដាក់ ក្នុងការបង្កបង្កើតផល ចិញ្ចឹមសត្វ កសាងជីវភាពរស់នៅថ្មីលើដីសម្បទានសង្គមកិច្ចដែលសម្ដេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត លោកបានផ្ដល់ជូន ឲ្យកាន់តែប្រសើរឡើង ។ ជាមួយនោះត្រូវយកចិត្តទុកដាក់ថែរក្សាសុខភាពឱ្យបានល្អ នឹងត្រូវចូលរួមអនុវត្តតាមគោលនយោបាយភូមិ ឃុំ មានសុវត្ថិភាព របស់រាជរដ្ឋាភិបាល ឱ្យទទួលបានជោគជ័យ ដើម្បីសេចក្តីសុខសាន្ត និងសុភមង្គលក្នុងក្រុមគ្រួសារនីមួយៗ នៅក្នុងភូមិអតីតយុទ្ធជនរបស់យើង។

នៅក្នុងឱកាសនេះដែរ ឧត្តមសេនីយ៍ទោ សោម ស៊ុន និងភរិយា ព្រមទាំងសហការី បានឧបត្ថម្ភអំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែត និងលោកជំទាវ ជូនក្រុមគ្រួសារអតីតយុទ្ធជនដែលមានជីវភាពលំបាកខ្វះខាតទាំង ១០គ្ររួសារ ដោយក្នុងមួយគ្រួសារទទួលបាននូវអង្ករចំនួន ២៥គីឡូក្រាម មីជាតិចំនួនមួយកេស ទឹកត្រីទឹកស៊ីអ៉ីវចំនួនមួយយួរ និងត្រីខកំប៉ុងចំនួនមួយយួរ ។ ដោយឡែកក្មួយៗ ចៅៗ ដែលបានចូលរួមក្នុងពិធីនេះ ក៏បានទទួលថវិកាមួយចំនួនផងដែរ។ អត្ថបទតំបន់សឹករងកំពង់ធំ-ពិនិត្យដោយអ៊ុមញឹប។

Видео ឧត្តមសេនីយ៍ទោ សោម ស៊ុន និងភរិយា សំណេះសំណាលសាកសួរសុខទុក្ខ ឧបត្ថម្ភអំណោយមនុស្សធម៌, 477-130725 канала KAMPONG THOM INFO