Ақтөбеліктер Димашқа тілекші

Қытай халық республикасында өтіп жатқан "Мен әншімін" байқауында Димаш Құдайберген қытай тілінде ән орындамақ. Бұл-байқаудың талабы. Халықаралық доданың 4-кезеңі алдымыздағы сенбі күні өтеді. Бүгін әншінің анасы мен ұстаздары Димаш білім алған Ахмет Жұбанов атындағы Ақтөбе музыкалық колледжінің студенттерімен кездесіп, әншінің мүмкіндіктері туралы әңгімеледі. "Мен әншімін" байқауынан кейін Димашты актер Джеки Чан арнайы іздеп барған. Жерлесіміз оған қазақтың шапаны мен домбырасын тарту етті. Актердің өтініші бойынша Н.Тілендиевтің "Әлқиссасын" шертіп берген. Бүгінгі кездесу барысында С.Айтбаева болашақ музыканттарға, тек вокалмен шектелмей, ұлттық аспаптар тартып үйренуге кеңес берді. Мәселен Димаш мәдениет саласының үздігі, күйші Жайлау Асылхановтан сабақ алған. 4 жасынан бастап ән айтатын 22 жастағы Димаш Құдайбергеновтің бұл алғашқы жетістігі емес."Жас қанат" республикалық байқауы, "Восточный базар" халықаралық байқауы мен "Мейкин Азия" халықаралық фестивалінің жеңімпазы. Ал 2015-жылы Витебск қаласында өткен "Славян базары" халықаралық байқауында гран-при жеңіп алды. Қытайды өтіп жатқан "Мен әншімін" халықаралық байқауы 14 турдан тұрады. Сәуір айында қорытындылануы тиіс. Жерлесіміз сайыстың үш кезеңінен кейін ең жоғары ұпай жинап, көш бастап тұр. 11-ақпанда ол қытай тілінде ән шырқайды. "Димаш "Еуровидение" халықаралық байқауына қатыспай-ақ мықтылығын дәлелдей алады". Бұл жас әншінің ұстазы ҚР еңбек сіңірген қайраткері Марат Әйтімовтың пікірі. "Еуровидение" халықаралық ән байқауына Қазақстан қатыса алмайды. Тек өзге елдің атынан шығу мүмкіндігі бар. Алайда, Марат Әйтімов шәкіртінің бұл байқаусыз-ақ мықты екенін мәлімдеді.

Видео Ақтөбеліктер Димашқа тілекші канала РИКА ТВ