Ushkyn Zhamalbek- Birlik jyry

Бірлік жыры
Таңжарық жолдыұлы

Сөзімді түсінгенің іріктейсің,
“Ірігі” не дегенде “бірлік” дейсің.
Бірлігің болмаса егер,жауларыңның,
Қолында маймен жаққан біліктейсің.

Жем болып ит пен құсқа айдалада,
Майы еріп күнде жатқан жіліктейсің.
Сен-терек,ішің қуыс,басқалар-құрт,
Жұп-жұмсақ қажауына шіріктейсің.

Болмаса өз ортаңда берік бірлік,
Қалайша көлеңкеңнен үрікпейсің?
Келгенде өз-өзіңе тісің өткір,
Тері теспей қан сорған сүліктейсің.

Астыртын алалықты салып қойып,
“Ел іші кеткен неғып іріп?” Дейсің.
Қоймасаң осы жаман мінезіңді,
Қауымның қатарына ілікпейсің.

Қайталап тағы айтайын, бірікпесең,
Жауларға даяр азық-түліктейсің.
Істетсе керегінше өз еркімен,
Кәдімгі иесі жоқ мүліктейсің.

Талпынып жатыр бірлік еткен халық,
Сен ғана шөже басқан күріктейсің.
Солардан бір мүшең кем жаралған жоқ,
Жалғыз-ақ ақыл қосып бірікпейсің.

Бірліктің не екенін шын түсінсең,
Өзің-ақ,ең алдымен, бірік дейсің.

Видео Ushkyn Zhamalbek- Birlik jyry канала Ushkyn Zhamalbek