ҚР азаматтарына шетелге 10000 АҚШ долларынан артық қолма-қол ақша алып шығуына тыйым салынды

Заңға сай Қазақстан азаматтарының депозиттік шоттары Қазақстанның депозитке кепілдік беру қорымен қорғалған. Бүгінде аталмыш қордың арнайы резервінде 856 миллиард теңге жинақталыпты. Еліміздің депозиттерге кепілдік беру жүйесіне екінші деңгейлі 20 банк кіреді. Бұл ретте салымшылардың барлығына дерлік толық көлемде кепілдік қаралған. Алайда соңғы жағдайларға сәйкес кейбір банк бөлімшелерінде шетелдік валюта тапшы. Доллармен депозит ашқандар ақшаларын уақытында ала алмай жүр.
Елорда тұрғыны Нариман Ахметов банк бөлімшесінен өз салымын уақытында ала алмай жүр. Айтуынша оған себеп, банк қызметкерлерінің дұрыс ақпарат бермеуінде. Нариман өз депозитін шетел валютасында салған. Алғаш барғанында мамандар Ұлттық банктің қаулысы бойынша қазір ақшаңызды ала алмайсыз деп қайтарған. Алайда ол шындыққа жанаспаған. Ұлттық банк бұл ақпартты жоққа шығарды дейді.
НАРИМАН АХМЕТОВ, Нұр-Сұлтан қаласының тұрғыны:
– Неге банктер бұл туралы өз салымшыларына алдын ала хабарламайды?! Қаржы нарығында осындай жағдай болып жатқанын біледі. Банк бөлімшелеріне жүгіріп, қазіргідей дүрбелең тудырмау үшін банк алдын-ала ресми түрде мәлімдеме жасауы керек еді ғой.
Ал елдегі екінші деңгейлі банктердің мәліметінше қазір елде шетел валютасы тапшы. Әлемдегі геосаяси оқиғалармен, Ресейге қойылған шектеулердің кесірінен батыс елдерінен бізге долларды жеткізу баяулаған. Бұл уақытша тапшылық тек қолма-қол валютаға қатысты, доллармен аударымдар мен онлайн операцияларды еркін жасауға болады дейді елдегі банк басшыларының бірі.
МИХАИЛ ЛОМТАДЗЕ, "Kaspi Bank" АҚ басшысы :
– Бұл Ресейге қарсы санкцияларға тікелей байланысты уақытша құбылыс, соның салдарынан әдеттегі бағыттар бойынша қолма-қол ақшаны жеткізу қиынға соғуда. Мысалы, Украина мен Ресейді айналып өту салдарынан тұрақты рейстердің уақыты ұзарып кеткенін немесе мүлде тоқтап жатқанын бәріміз көріп отырмыз. Қолма-қол ақшаны жеткізуде осындай мәселе бар.
Ұлттық банк қазір қолма-қол ақшаны АҚШ-тан тікелей жеткізуді ұйымдастырумен айналысып жатыр. Жақын арада бұл мәселе шешімін табады дейді.
ҚР ҰЛТТЫҚ БАНКІНІҢ БАСПАСӨЗ ҚЫЗМЕТІ:
– Ұлттық Банк Қазақстан Республикасында шетелдік валютадағы операцияларға шектеу енгізу туралы қаулы немесе басқа да заңға тәуелді актілер қабылдамағанын хабарлайды. Қазіргі жағдайды ескере отырып, Ұлттық Банк АҚШ-тың орталық банкі - Федералдық резервтік жүйеден қолма-қол шетел валютасының қосымша көлемін жеткізу амалдарын қарастырып жатыр.
Ұлттық банктың мәліметінше, қолма-қол ақшаны көлік компаниялары арқылы өз уақытында жеткізу қарастырылған. Ол үшін барлық қажетті келісімдер бар дейді.
Бұдан былай ел азаматтары шетелге 10 мың АҚШ долларынан артық қолма-қол ақшаны алып шыға алмайды. Мұндай жарлыққа Президент Тоқаев осыдан бір сағат бұрын қол қойды. Сондай-ақ, 5, 10, 20, 50 және 100 граммдық алтын құймалары мен алтын және күмістен жасалған «Алтын барыс» пен «Күміс барыс" инвестициялық монетасын алып шығуға да шектеу енгізілді. Одан бөлек, салмағы 100 граммнан асатын тазартылған алтынды да алып шығуға рұқсат жоқ. Бұл шектеу шаралары қолма-қол шетел валюталарының мөлшерден тыс сыртқа шығып кетпеуін бақылауды реттейді. Сондай-ақ, Ұлттық Банктегі резервтердің сақталуын қамтамасыз ету үшін жасалынған шара екен. Айта кетейік, бүгінгі уақытта сыртқы күйзелістердің салдарынан қолма-қол долларға деген сұраныс артқан.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#ҰлттықБанк #резерв #депозит #ҚазақстанБанктері #доллар

Видео ҚР азаматтарына шетелге 10000 АҚШ долларынан артық қолма-қол ақша алып шығуына тыйым салынды канала Информбюро 31